पुणे: नीट आणि सीबीएसई परीक्षांबाबत निर्माण झालेल्या वादाच्या पार्श्वभूमीवर केंद्रीय शिक्षण मंत्री धर्मेंद्र प्रधान यांच्या राजीनाम्याच्या मागणीसाठी कॉक्रोच जनता पार्टीने आंदोलनाची भूमिका कायम ठेवली आहे. दिल्लीतील आंदोलनानंतर आता पक्षाने महाराष्ट्रातही आंदोलन करण्याचा निर्णय घेतला असून पुढील आंदोलन पुण्यात होणार असल्याची घोषणा करण्यात आली आहे.
पक्षाचे संस्थापक अभिजीत दीपके यांनी याबाबत माहिती देताना, देशभरातील विद्यार्थ्यांच्या प्रश्नांवर आवाज उठवण्यासाठी विविध शहरांमध्ये आंदोलनांची मालिका राबविण्यात येणार असल्याचे सांगितले. त्यानुसार पुण्यात 11 जून रोजी दुपारी 4 वाजता सावित्रीबाई फुले पुणे विद्यापीठ परिसरात आंदोलन आयोजित करण्यात आले आहे.
दिल्लीतील जंतरमंतर येथे पक्षाने पहिले आंदोलन केले होते. त्या आंदोलनाला तरुणांचा चांगला प्रतिसाद मिळाल्याचा दावा पक्षाकडून करण्यात आला आहे. अभिजीत दीपके हे अमेरिकेतून भारतात परतल्यानंतर थेट आंदोलनस्थळी पोहोचल्याचेही सांगण्यात आले.
पुण्यातील आंदोलनातूनही केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी करण्यात येणार आहे. या आंदोलनात पक्षाचे कार्यकर्ते, समर्थक तसेच विद्यार्थी मोठ्या संख्येने सहभागी होण्याचे आवाहन करण्यात आले आहे.
अभिजीत दीपके हे मूळचे महाराष्ट्रातील असल्याने राज्यातील त्यांच्या पहिल्या आंदोलनाकडे विशेष लक्ष लागले आहे. दिल्लीतील आंदोलनात हजारो नागरिक सहभागी झाल्याचा दावा त्यांनी केला होता. आंदोलनाच्या उपस्थितीबाबत काहींनी उपस्थित केलेल्या प्रश्नांनाही त्यांनी उत्तर दिले होते.
दरम्यान, पुण्यात होणाऱ्या आंदोलनासाठी पोलिसांची अधिकृत परवानगी मिळाली आहे की नाही, याबाबत अद्याप स्पष्ट माहिती समोर आलेली नाही. त्यामुळे आगामी आंदोलनाला किती प्रतिसाद मिळतो आणि त्यातून कोणता संदेश जातो, याकडे राजकीय आणि शैक्षणिक क्षेत्राचे लक्ष लागले आहे.
