Pune News : पुणे शहरात चोरीच्या घटना दिवसेंदिवस वाढत चालल्या असून, चोरट्यांनी आता थेट बंद घरांवर लक्ष केंद्रित केल्याचं दिसत आहे. शहरातील उच्चभ्रू परिसरही आता सुरक्षित राहिलेला नाही. कोथरूडसारख्या प्रतिष्ठित भागात पुन्हा एकदा घरफोडीची घटना समोर आली आहे. (Pune News)
कोथरूडमधील आझादनगर परिसरात असलेल्या ‘सुखाई कॉम्प्लेक्स’ या सोसायटीतील एका बंद फ्लॅटचे कुलूप तोडून चोरट्यांनी तब्बल ६ लाख ३० हजार रुपयांचे सोन्याचे दागिने चोरून नेले आहेत. या घटनेमुळे परिसरात एकच खळबळ उडाली आहे.
मिळालेल्या माहितीनुसार, घरमालक ५ डिसेंबर रोजी काही कामानिमित्त बाहेरगावी गेले होते. घर बंद असल्याची संधी साधत चोरट्यांनी मुख्य दरवाजाचे कुलूप फोडले आणि घरात घुसखोरी केली. घरातील कपाटे उघडून त्यातील मौल्यवान दागिने लंपास करून चोरटे पसार झाले.
घरमालक परत आल्यानंतर हा प्रकार लक्षात आला. त्यांनी तात्काळ कोथरूड पोलीस ठाण्यात तक्रार दिली. पोलिसांनी अज्ञात चोरट्यांविरोधात गुन्हा दाखल केला असून, सोसायटी आणि आसपासच्या परिसरातील सीसीटीव्ही फुटेज तपासण्याचं काम सुरू आहे.
दरम्यान, पुण्यात फसवणुकीचीही एक धक्कादायक घटना उघडकीस आली आहे. हिंजवडी परिसरात राहणाऱ्या एका आयटी इंजिनिअरची तब्बल २३ लाख ८० हजार रुपयांची फसवणूक झाली आहे. घरगुती सामान झारखंडला पोहोचवतो, असं सांगत एका खासगी कंपनीने त्याचा विश्वासघात केल्याचा आरोप आहे.
‘EIE मार्केट प्लेस टेक्नॉलॉजी’ या कंपनीच्या पदाधिकाऱ्यांनी सामान ताब्यात घेऊन ते परत न देता फसवणूक केल्याप्रकरणी हिंजवडी पोलिसांनी गुन्हा दाखल केला आहे. या प्रकरणाचा पुढील तपास पोलीस करत आहेत.
