Pune News: पुणे: पुणेकरांच्या प्रवासाला आज ‘ब्रेक’ लागणार आहे. शहरात आयोजित करण्यात आलेल्या ‘पुणे ग्रैंड चॅलेंज टूर’ (Pune Grand Challenge Tour) या आंतरराष्ट्रीय सायकल शर्यतीमुळे वाहतूक व्यवस्थेत मोठे बदल करण्यात आले असून, याचा सर्वाधिक फटका सार्वजनिक वाहतुकीला बसणार आहे. आज सकाळी 9 वाजेपासूनच शहरातील महत्त्वाचे रस्ते बंद झाल्याने पीएमपी प्रशासनावर हजारो फेऱ्या रद्द करण्याची वेळ आली आहे. रस्ते बंद ठेवल्यामुळे पीएमपीच्या सुमारे 2500 फेऱ्या रद्द होणार असून 150 पेक्षा जास्त बस मार्ग वळविण्यात येणार आहेत.
पुणे जिल्हा प्रशासन आणि सायकलिंग फेडरेशन ऑफ इंडियाच्या सहकार्याने 19 ते 24 जानेवारी दरम्यान या आंतरराष्ट्रीय सायकल शर्यतीचे आयोजन करण्यात आले आहे. त्यातील आज होणाऱ्या ‘प्रोलॉग’ स्पर्धेसाठी शहरातील मध्यवर्ती भागातून सायकल शर्यतीचा मार्ग निश्चित करण्यात आला आहे. या मार्गात खंडुजीबाबा चौक, नामदार गोपाळ कृष्ण गोखले चौक, तुकाराम महाराज पादुका चौक, ललित महल चौक, चापेकर चौक, सिमला ऑफिस चौक, संचेटी चौक, बालगंधर्व चौक आणि डेक्कन जिमखाना बस स्थानकाचा समावेश आहे.
या स्पर्धेमुळे फर्ग्युसन महाविद्यालय रस्ता, विद्यापीठ रस्ता, जंगली महाराज रस्ता आणि त्यांना जोडणारे उपरस्ते पूर्णपणे बंद ठेवण्यात येणार आहेत. त्यामुळे डेक्कन बस स्थानकही आज बंद राहणार आहे. या मार्गांवरून धावणाऱ्या अनेक बस फेऱ्या रद्द होतील, तसेच पुणे आणि पिंपरी-चिंचवड शहरांना जोडणाऱ्या काही बस सेवा तात्पुरत्या स्वरूपात बंद राहण्याची शक्यता आहे. काही बस सेनापती बापट रस्ता आणि पुणे स्टेशनमार्गे वळविण्यात येणार आहेत.
या परिसरात अनेक कार्यालये आणि व्यावसायिक आस्थापने असल्याने नोकरदारांना कार्यालयात पोहोचण्यासाठी पर्यायी मार्गांचा वापर करावा लागणार आहे. खासगी वाहनांनाही या मार्गांवर प्रवेशबंदी असणार आहे.
दरम्यान, स्पर्धा सुरळीत पार पाडण्यासाठी शहरात कडेकोट पोलिस बंदोबस्त तैनात करण्यात आला आहे. स्पर्धेच्या मार्गावर सुमारे 1500 पोलिसांचा बंदोबस्त असणार असून वाहतूक नियोजनासाठी विशेष उपाययोजना करण्यात आल्या आहेत. नागरिकांनी गैरसोय टाळण्यासाठी पर्यायी मार्गांचा वापर करावा, असे आवाहन प्रशासनाकडून करण्यात आले आहे.
