नाशिक: अध्यात्माच्या नावाखाली महिलांचे शोषण आणि कोट्यवधींची माया जमवणाऱ्या अशोक खरातच्या संकटात आता मोठी वाढ झाली आहे. एसआयटीने (SIT) आपला तपासाचा फास आणखी आवळला असून, त्याची पत्नी कल्पना खरात हिच्याविरुद्ध ‘लूकआउट नोटीस’ जारी करण्यात आली आहे. धक्कादायक बाब म्हणजे, ज्या पत्नीच्या नावे खरातने संपत्ती गोळा केली, तिनेच आपल्या माहेरच्यांशी सर्व संबंध तोडले असल्याचे समोर आले आहे.
अशोक खरातची पत्नी कल्पना गेल्या काही दिवसांपासून फरार आहे. दरम्यान, तिला शोधण्यासाठी एसआयटीचे पथक जेव्हा सिन्नर तालुक्यातील पाडली येथील तिच्या माहेरी पोहोचले, तेव्हा कल्पनाचे आई-वडील आणि भाऊ अत्यंत साध्या परिस्थितीत शेती करून उदरनिर्वाह करत असल्याचे समोर आले आहे. खरातने लग्नानंतर कल्पनाला तिच्या माहेरच्या लोकांशी साधे बोलूही दिले नव्हते. “आमच्या लेकीने आणि जावयाने कधीच आमची विचारपूस केली नाही,” अशी हतबलता तिच्या माहेरच्यांनी व्यक्त केली.
शिर्डीतील एका शेतकऱ्याची जमीन हडपल्याचा गंभीर आरोप कल्पना खरातवर आहे. विशेष म्हणजे, ज्या माहेरच्यांशी संबंध नसल्याचे सांगितले जात होते, त्याच दोन भावांच्या बँक खात्यावर मोठे आर्थिक व्यवहार झाल्याचे पुरावे पोलिसांना सापडले आहेत. दरम्यान, याप्रकरणी अधिक तपास करत आहेत.
