हजारीबाग (झारखंड): मायेची सावली म्हणवल्या जाणाऱ्या आईनेच अंधश्रद्धेपोटी आपल्या 13 वर्षीय मुलीचा ‘नरबळी’ दिल्याचा धक्कादायक प्रकार उघडकीस आला आहे. सुरुवातीला बलात्कार आणि हत्येचा बनाव रचणाऱ्या आईचा कट पोलिसांनी उधळून लावला असून, या प्रकरणातील क्रूरतेने संपूर्ण देश हादरला आहे.
तपासात समोर आलेल्या माहितीनुसार, आरोपी आईचा लहान मुलगा सतत आजारी असायचा. मुलाच्या आजारपणावर उपचार करण्याऐवजी ही महिला एका तांत्रिकाच्या संपर्कात आली. “मुलाला पूर्णपणे बरे करायचे असेल, तर एका ‘कुमारी’ मुलीचा बळी द्यावा लागेल,” असे या तांत्रिकाने त्या माउलीला पटवून दिले. दुर्दैवाने, पुत्रप्रेमात आंधळ्या झालेल्या आईने स्वतःच्याच लेकीचा खून करण्याचा निर्णय घेतला.
24 मार्चच्या रात्री, जेव्हा संपूर्ण गाव रामनवमीच्या मिरवणुकीत दंग होते, तेव्हा गर्दीचा फायदा घेत मुलीला एका निर्जन ठिकाणी नेण्यात आले. तिथे तिला पूजेच्या नावाखाली कुंकू-काजळ लावून तांत्रिक विधी करण्यात आले आणि त्यानंतर तिचा गळा दाबून खून करण्यात आला. केवळ हत्या करून हे नराधम थांबले नाहीत, तर तिच्या गुप्तांगात काठी रक्त काढले आणि त्या रक्ताचा वापर करून तांत्रिक विधी करण्यात आले. पुरावे नष्ट करण्यासाठी मृतदेह बागेत पुरून, हे प्रकरण बलात्काराचे वाटावे असा बनाव रचण्यात आला. दरम्यान, पोलिस याप्रकरणी अधिक तपास करत आहेत.
