पुणे: पुणे (Pune News) शहरात सध्या वेगाचे वेड निष्पाप नागरिकांच्या जीवावर उठत आहे. येरवड्यातील सादलबाबा दर्गा परिसरात शुक्रवारी सायंकाळी एका भरधाव टेम्पोने अनेक वाहनांना धडक दिली. या अपघातात चाळीस वर्षीय व्यक्तीला आपला जीव गमवावा लागला आहे. या घटनेमुळे पादचाऱ्यांसाठी सुरक्षित मानल्या जाणाऱ्या फुटपाथवरही आता मृत्यूची टांगती तलवार असल्याचे समोर आले आहे.
सादलबाबा दर्गा रस्त्यावरून शुक्रवारी सायंकाळी एक टेम्पो अतिवेगाने जात होता. प्रत्यक्षदर्शींनी दिलेल्या माहितीनुसार, चालकाचे वाहनावरील नियंत्रण पूर्णपणे सुटले होते. या टेम्पोने प्रथम रस्त्यावरील एक रिक्षा आणि काही दुचाकींना जोरदार धडक दिली. मात्र, एवढ्यावरच हा अनियंत्रित टेम्पो थांबला नाही. तो थेट फूटपाथ जाणून धडकला. दुर्दैवाने, तिथे बसलेले सुशील निवृत्ती मोहिते (वय ४०) यांना स्वतःला वाचवण्याची संधी मिळाली नाही आणि टेम्पोचे चाक थेट त्यांच्या अंगावरून गेल्याने त्यांचा जागीच मृत्यू झाला.
अतिवेगवान ड्रायव्हिंग हे अशा अपघातांचे मुख्य कारण ठरत आहे. याप्रकरणी लक्ष्मीनगर पोलिसांनी ६२ वर्षीय टेम्पो चालक आदम चाँद शेख याला बेड्या ठोकल्या आहेत. दरम्यान, हा अपघात चालकाकडून झालेली ही चूक आहे की तांत्रिक बिघाड, याचा तपास आता पोलीस करत आहेत.
