पुणे: पुण्यात गुन्हेगारांना (Pune News) आता कायद्याचे भय उरले नसल्याचेच सिद्ध केले आहे. ससून प्रवेशद्वारावरच दोन गट भिडल्याची धक्कादायक घटना घडली आहे. भरवस्तीत आणि संवेदनशील अशा ससून रुग्णालयाच्या गेटवरच एकमेकांवर शस्त्राने हल्ला चढवल्यामुळे रुग्ण आणि त्यांच्या नातेवाईकांमध्ये भीतीचे वातावरण पसरले आहे. या प्रकरणी कोंढवा पोलिसांनी दोन्ही गटांच्या 18 जणांविरुद्ध गुन्हा दाखल केला आहे. आतापर्यंत 3 जणांना बेड्या ठोकण्यात आल्या असून, उर्वरित आरोपींचा शोध सुरु आहे.
3 फेब्रुवारी रोजी कोंढव्यातील कौसरबाग परिसरात काही तरुण शिवीगाळ करत असताना अस्लम खान यांनी नागरिक म्हणून आपली जबाबदारी पार पाडत पोलीस नियंत्रण कक्षाला कळवले. मात्र, “पोलिसांना फोन करून शहाणपणा का केला?” असा जाब विचारत आरोपी शफाक शेख आणि त्याच्या टोळीने अस्लम यांना लोखंडी फायटरने बेदम मारहाण केली.
दरम्यान, अस्लम यांना उपचारासाठी ससून रुग्णालयात नेण्यात आले. अस्लम यांना भेटण्यासाठी त्यांचे भाऊ आणि पुतणे तिथे आले असता, पाठलाग करत आलेल्या आरोपींनी ससूनच्या गेटवरच धारदार शस्त्राने हल्ला केला. यात अस्लम खान यांच्यासह त्यांचे नातेवाईकही गंभीर जखमी झाले आहे.
