पुणे: पुण्यात (Pune News) उद्या आंतरराष्ट्रीय दर्जाची ‘बजाज पुणे ग्रँड टूर 2026’ ही सायकलिंग स्पर्धा होणार आहे. मात्र, या जागतिक इव्हेंटमुळे पुणेकरांच्या दैनंदिन प्रवासावर मोठा परिणाम होणार आहे. विशेषतः मध्यवर्ती पुण्यातील वाहतूक पूर्णपणे थांबवण्यात येणार असल्याने, जिल्हाधिकारी जितेंद्र डुडी यांनी उद्या, सोमवार, 19 जानेवारी रोजी शहरातील आठ भागातील शाळा आणि महाविद्यालयांना सुट्टी जाहीर केली आहे.
सुट्टी नेमकी का?
पुणे शहरातील सर्वात गजबजलेले चौक आणि रस्ते सकाळी 9 ते संध्याकाळी 6 या काळात सर्वसामान्य वाहतुकीसाठी ‘नो-एन्ट्री’ झोन ठरणार आहेत. मुळात, ज्या रस्त्यांवरून शालेय बस आणि विद्यार्थ्यांची वाहने धावतात, त्याच रस्त्यांवरून ताशी 50-60 किमी वेगाने सायकली धावणार आहेत. अशा वेळी कोणतीही दुर्घटना घडू नये आणि वाहतूक कोंडी होऊ नये, म्हणूनच जिल्हाधिकारी जितेंद्र डुडी यांनी शाळा-महाविद्यालये बंद ठेवण्याचा निर्णय घेतला आहे.
तुमची शाळा ‘या’ भागात येते का?
खालील भागात येणाऱ्या सर्व शाळा, महाविद्यालये, अंगणवाड्या आणि कोचिंग क्लासेसला ही सुट्टी लागू असेल:
-
शिवाजीनगर-घोले रोड
-
विश्रामबाग वाडा-कसबा पेठ
-
ढोले पाटील रोड व भवानी पेठ
-
औंध-बाणेर
-
कोथरुड-बावधन
-
सिंहगड रोड आणि वारजे-कर्वेनगर
उद्याच्या शर्यतीमुळे फर्गसन कॉलेज (FC) रोड, गणेशखिंड रस्ता आणि जंगली महाराज (JM) रोड हे महत्त्वाचे मार्ग आणि त्यांना जोडणारे सर्व उपमार्ग वाहतुकीसाठी बंद असतील. जर तुम्हाला उद्या कामासाठी घराबाहेर पडायचे असेल, तर शक्यतो मेट्रोचा वापर करा किंवा पर्यायी मार्गांचे नियोजन आधीच करा.
