पुणे: ख्रिसमसच्या रात्री उशिरा पूर्व (Pune Crime) पुण्यातील एका नामांकित बार आणि रेस्टॉरंटमध्ये कथित लैंगिक गैरवर्तनाचा गंभीर प्रकार उघडकीस आला आहे. या प्रकरणामुळे शहरात एकच खळबळ उडाली असून, महिला सुरक्षेचा मुद्दा पुन्हा ऐरणीवर आला आहे. संबंधित प्रकरणी पोलिसांकडे तक्रार दाखल करण्यात आली असून तपास सुरू आहे. (Latest Marathi News)
पोलिसांकडे दाखल तक्रारीनुसार, ख्रिसमस पार्टीच्या सुरक्षेसाठी तैनात असलेल्या एका महिला बाऊन्सरला रात्री उशिरा संबंधित आस्थापनेच्या कार्यालयात बोलावण्यात आले. तक्रारीत असा आरोप करण्यात आला आहे की, त्या ठिकाणचे हॉटेलिअर संदीप सहस्रबुद्धे यांनी महिलेशी अयोग्य वर्तन केले. एफआयआरनुसार, “मला तुमच्याकडून काहीतरी पाहिजे” अशी अयोग्य टिप्पणी करत त्यांनी लैंगिक स्वरूपाचे संकेत दिल्याचा आरोप पीडित महिलेने केला आहे.
या प्रकारामुळे घाबरलेल्या महिलेने तत्काळ तेथून बाहेर पडत थेट पोलिस ठाणे गाठले आणि घडलेला प्रकार पोलिसांना सांगितला. तिच्या तक्रारीच्या आधारे पोलिसांनी गुन्हा दाखल केला असून, प्रकरणाचा सखोल तपास सुरू आहे. घटनेच्या वेळी नेमके काय घडले, कार्यालयात कोण कोण उपस्थित होते, तसेच सीसीटीव्ही फुटेज उपलब्ध आहे का, याबाबत पोलिसांकडून तपास केला जात आहे.
संदीप सहस्रबुद्धे हे पुण्यातील अनेक नामांकित बार आणि रेस्टॉरंट्सशी संबंधित प्रसिद्ध हॉटेलिअर म्हणून ओळखले जातात. त्यामुळे या प्रकरणाला अधिक गंभीर स्वरूप प्राप्त झाले आहे. पोलिसांकडून सर्व बाबी तपासून पुढील कारवाई केली जाणार असल्याचे सांगण्यात आले आहे. या घटनेमुळे हॉटेल आणि बारमध्ये काम करणाऱ्या महिलांच्या सुरक्षेचा प्रश्न पुन्हा चर्चेत आला आहे.
