Pune Crime News: लोणी काळभोर, ता. 19 : कुंजीरवाडी (ता. हवेली) परिसरात मध्यरात्री संशयास्पद हालचाली करत उभ्या असलेल्या दोन तरुणांना लोणी काळभोर पोलिसांनी तलवारीसह अटक केली आहे. ही कारवाई सोमवारी (ता. 16) मध्यरात्री गस्त घालत असताना करण्यात आली. पोलिसांच्या वेळीच केलेल्या कारवाईमुळे संभाव्य गंभीर गुन्हा टळल्याची चर्चा परिसरात सुरू आहे.
रोहित लक्ष्मण गाडे (वय 21, रा. प्रयागधाम रोड, नायगावपेठ, उरुळी कांचन) आणि आदित्य महेश भंडवलकर (वय 20, रा. माळवाडी, कुंजीरवाडी) अशी अटक करण्यात आलेल्या आरोपींची नावे आहेत. याप्रकरणी पोलीस अंमलदार सचिन सोनवणे यांनी सरकारच्या वतीने लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, पोलीस हवालदार अन्ना माने, पोलीस अंमलदार सचिन सोनवणे आणि मयूर बोरावके हे 16 मार्च रोजी रात्री गस्तीवर होते. रात्री सुमारे 9 वाजल्यापासून सुरू असलेल्या पेट्रोलिंगदरम्यान कुंजीरवाडी येथील नव्या कालव्याजवळ दोन संशयित इसम शस्त्रासह उभे असल्याची खात्रीशीर माहिती पोलिसांना खबऱ्यामार्फत मिळाली. मिळालेल्या माहितीच्या आधारे पोलिसांनी त्या ठिकाणी सापळा रचला.
पोलिसांनी काही अंतरावर आडोशाला थांबून निरीक्षण केले असता दोन तरुण गप्पा मारत उभे असल्याचे दिसले. पोलिसांची चाहूल लागताच दोघांनी पळून जाण्याचा प्रयत्न केला. मात्र पोलिसांनी पाठलाग करून त्यांना मध्यरात्री सुमारे 1 वाजण्याच्या सुमारास शिताफीने पकडले. त्यांच्या झडतीत रोहित गाडे याच्या पँटमध्ये लपवून ठेवलेली सुमारे 23 इंच लांबीची लोखंडी तलवार आढळून आली. तलवार पंचांसमक्ष जप्त करून सीलबंद करण्यात आली.
दरम्यान, शहरात 17 मार्च ते 30 मार्च या कालावधीत शस्त्रे बाळगण्यास बंदी असतानाही हे दोघे तलवारीसह फिरताना आढळून आले. त्यामुळे त्यांनी आदेशाचे उल्लंघन केल्याचे स्पष्ट झाले. या प्रकरणी भारतीय हत्यार कायदा कलम 4(25) तसेच महाराष्ट्र पोलीस कायदा कलम 37(1) सह 135 अंतर्गत गुन्हा दाखल करण्यात आला आहे.
या कारवाईमुळे परिसरात भीतीचे वातावरण निर्माण होण्यापूर्वीच परिस्थिती नियंत्रणात आल्याची प्रतिक्रिया नागरिकांकडून व्यक्त होत आहे. पुढील तपास लोणी काळभोर पोलिसांकडून सुरू आहे.
