Pune Crime News : वाघोली, ता. 26 : पुणे शहरात शस्त्र बाळगण्यास मनाई असतानाही बेकायदेशीरपणे कोयते बाळगणाऱ्या दोन तरुणांना गुन्हे शाखा युनिट 7 च्या पथकाने जेरबंद केले आहे. वाघेश्वर नगर आणि लोहगाव रोड परिसरात मंगळवारी (ता. 24) रात्री उशिरा या कारवाया करण्यात आल्या. यामध्ये एका 16 वर्षीय मुलासह 20 वर्षीय तरुणाचा समावेश आहे.
पहिली घटना मंगळवारी रात्री साडेदहा वाजण्याच्या सुमारास वाघेश्वर नगर येथील भैरवनाथ तलावाजवळ घडली. गायरान झोपडपट्टी परिसरात 16 वर्षीय अल्पवयीन मुलगा लोखंडी कोयता बेकायदेशीरपणे जवळ बाळगताना आढळला. पोलिसांनी त्याच्याकडील कोयता जप्त केला असून त्याच्याविरुद्ध गुन्हा दाखल केला आहे.
दुसऱ्या कारवाईत रात्री सव्वा अकरा वाजण्याच्या सुमारास लोहगाव रोडवरील शिवरकर वस्ती येथे एका पडक्या घरासमोर तुषार गोरख चांदणे (वय 20, रा. मथुराईनगर, वाघोली) हा तरुण लोखंडी कोयता जवळ बाळगून असताना पोलिसांना आढळला. त्याच्याकडूनही 500 रुपये किमतीचा कोयता जप्त करण्यात आला आहे.
पुणे शहराचे पोलीस उपआयुक्त (विशेष शाखा) यांनी 14 मार्च 2026 रोजी एक आदेश जारी केला होता. या आदेशानुसार 17 मार्च ते 30 मार्च 2026 या 14 दिवसांच्या कालावधीत महाराष्ट्र पोलीस कायदा कलम 37 (1)(2)(3) अन्वये शस्त्रे, तलवारी, कोयते किंवा शारीरिक इजा पोहोचवणारी कोणतीही वस्तू जवळ बाळगण्यास सक्त मनाई करण्यात आली आहे.
दरम्यान, या आदेशाचे उल्लंघन केल्याप्रकरणी दोन्ही आरोपींविरुद्ध भारतीय हत्यार कायदा कलम 4(25) आणि महाराष्ट्र पोलीस कायदा कलम 135 नुसार सरकारतर्फे फिर्याद देण्यात आली आहे.
