पुणे: पुणे स्टेशनला जाण्यासाठी शास्त्रीनगर (Pune Crime) चौकात थांबलेल्या एका प्रवाशाला लिफ्ट देण्याच्या बहाण्याने कारमध्ये घेत मारहाण करून लुटल्याचा गंभीर प्रकार उघडकीस आला आहे. या प्रकरणातील टोळीचा पर्दाफाश करत गुन्हे शाखेच्या युनिट 4 ने तीन जणांना अटक केली असून, एक साथीदार अद्याप फरार आहे.
अटक करण्यात आलेल्यांमध्ये राहुल किसन सावंत (वय 19, रा. समर्थनगर, खराडी), निशांत झुंबर बागुल (वय 21, रा. चिखलठाण, ता. पारनेर, जि. अहिल्यानगर) आणि महेश रामकिशन सोनटक्के (वय 20, रा. खांदवेनगर, गीताई पार्क, लोहगाव) यांचा समावेश आहे. आरोपींकडून फिर्यादीचा चोरलेला मोबाईल, त्यांचे 3 मोबाईल, गुन्ह्यात वापरलेली स्विफ्ट डिझायर कार आणि लोखंडी कोयता असा एकूण 7 लाख 41 हजार रुपयांचा मुद्देमाल जप्त करण्यात आला आहे.
याप्रकरणी प्रेमजी पाटीदार (वय 42, रा. नरपतगिरी चौक, सोमवार पेठ) यांनी येरवडा पोलीस स्टेशन येथे फिर्याद दिली आहे. ही घटना 30 जानेवारी रोजी रात्री 10 ते 31 जानेवारी पहाटे 2:30 या वेळेत घडली. शास्त्रीनगर चौकात थांबलेल्या पाटीदार यांना पांढऱ्या रंगाच्या डिझायर कारमधील चौघांनी लिफ्ट देतो असे सांगून गाडीत घेतले. त्यानंतर बंडगार्डन परिसरात फिरवत त्यांना मारहाण करण्यात आली. मोबाईलवरील गुगल पेच्या माध्यमातून जबरदस्तीने 18 हजार 800 रुपये ट्रान्सफर करून घेतले आणि मोबाईल काढून घेऊन आरोपी पसार झाले.
घटनेनंतर गुन्हे शाखेच्या युनिट 4 चे पथक चंदननगर परिसरात पेट्रोलिंग करत असताना बातमीदारामार्फत माहिती मिळाली की, शास्त्रीनगर चौकातील लुटीत वापरलेली कार आणि संशयित खराडीतील हॉटेल जत्रा येथे थांबले आहेत. खात्री करून पोलिसांनी छापा टाकत तिघांना ताब्यात घेतले. सुरुवातीला टाळाटाळ करणाऱ्या आरोपींनी चौकशीनंतर गुन्ह्याची कबुली दिली. त्यांना पुढील कारवाईसाठी येरवडा पोलीस ठाण्याच्या ताब्यात देण्यात आले आहे.
ही कारवाई वरिष्ठ अधिकाऱ्यांच्या मार्गदर्शनाखाली करण्यात आली असून, फरार आरोपीचा शोध सुरू आहे. सार्वजनिक ठिकाणी लिफ्ट देण्याच्या बहाण्याने होणाऱ्या गुन्ह्यांबाबत नागरिकांनी सतर्क राहावे, असे आवाहन पोलिसांकडून करण्यात आले आहे.
