पुणे: दुबई व टांझानिया देशांतून कमी दरात ‘स्क्रॅप मटेरियल’ मिळवून भारतात पुरवठा करण्याचे आमिष दाखवून अनेक व्यावसायिकांची आर्थिक फसवणूक करणाऱ्या मोठ्या रॅकेटचा भंडाफोड खडक पोलिसांनी केला आहे. या प्रकरणात मुख्य सूत्रधारासह गुन्ह्यातील एक आरोपीस अटक केली आहे. तर दुसरा आरोपी रुग्णालयातील उपचारादरम्यान मृत्यूमुखी पडल्याचे पोलिसांनी सांगितले.
आरोपींनी 2023 मध्ये सुमारे 57 टन स्क्रॅप मटेरियल दुबई येथून भारतीय बंदरांवर पाठवणार असल्याचे सांगून लाखो रुपयांच्या व्यवहारांचे आमिष दाखवले होते. यासाठी मुंबई, दिल्ली व गुजरात येथील कंपन्यांना संपर्क करून व्यवहार निश्चित करण्यात आला होता.
आरोपी सुनील बोराडे याने पीडित व्यावसायिकांकडून 3 कोटी 89 लाख 39 हजार 315 रुपये घेतले होते. व्यवहार निश्चित झाल्यानंतरही स्क्रॅप माल भारतात पोहोचवण्यात कोणतीही कार्यवाही न होता, संबंधितांनी पैसे परत करण्यास नकार दिल्यामुळे फसवणुक झाल्याचे समोर आले.
या प्रकरणाची तक्रार दाखल होताच खडक पोलिसांनी सखोल तपास करून संबंधितांवर महाराष्ट्र डिजिटल सुरक्षा अधिनियम, तसेच भारतीय न्याय संहिता 2023 मधील विविध गंभीर कलमांअंतर्गत गुन्हा दाखल केला आहे.
मुख्य आरोपीची अटक; दुसरा आरोपी कस्टडीत मृत्यूमुखी
तपासादरम्यान मुख्य आरोपी भूपेंद्रसिंग उर्फ संजय कुमार राठोड याला अटक केली. त्याच्यावरील माहितीच्या आधारे दुसरा संशयित आरोपीही अटकेत घेतला होता. मात्र, पोलिस कस्टडीत असताना तब्येत बिघडल्याने त्याचा उपचारादरम्यान मृत्यू झाला, असे पोलिसांनी स्पष्ट केले आहे.
या प्रकरणाशी संबंधित 6 बँक खाते, दुबई व मुंबईतील आर्थिक व्यवहारांचे दस्तऐवज आणि अनेक इलेक्ट्रॉनिक पुरावे पोलिसांनी ताब्यात घेतले आहेत. तपासात आरोपी विदेशात पळून जाऊ नयेत म्हणून लुकआऊट नोटिस जारी करण्यात आली आहे.
सदर कारवाई अमितेश कुमार, पोलिस आयुक्त पुणे शहर, राजेश बनसोडे, अपर पोलीस आयुक्त, पश्चिम प्रादेशिक विभाग, पुणे शहर, कृषीकेश रावले, पोलीस उपयुक्त, परिमंडळ 1 पुणे शहर, अनुजा देशमाने, सहाय्यक पोलीस उपयुक्त यांच्या मार्गदर्शनाखाली खडक पोलीस ठाण्याचे वरिष्ठ पोलीस निरीक्षक, शशिकांत चव्हाण, पोलीस निरीक्षक (गुन्हे) , शर्मिला सुतार, मनोज कुमार लोंढे, पोलीस उपनिरीक्षक, भारत बोराडे, सहाय्यक पोलीस फौजदार संतोष मोहिते, पो. हवालदार, योगेश कुंभार, राजाराम गाढवे, किरण खुडे, किरण घुटे, पोलीस शिपाई, संतोष साबळे यांनी केली.
पोलिसांनी नागरिकांना आवाहन केले आहे की, असे ‘कमी दरात परदेशातून माल पाठविण्याचे’ आमिष दाखवून होणाऱ्या फसवणुकीपासून सावध राहावे. अशा प्रकारच्या कोणत्याही संशयास्पद व्यवहारांची माहिती जवळच्या पोलीस ठाण्यात द्यावी, असे पोलिसांनी म्हटले आहे.
