आदित्य बोराटे
इंदापूर: पीककर्ज मंजुरीसाठी शेतकऱ्याकडून लाचेची मागणी करणाऱ्या इंदापूर तालुक्यातील पंधरवाडी येथील जय भवानी विविध कार्यकारी सहकारी सोसायटीच्या सचिवाला अॅन्टी करप्शन ब्युरोच्या (ACB) पथकाने रंगेहात पकडत मोठी कारवाई केली. याप्रकरणी नाना चंद्रकांत बोराटे (वय 43) याच्याविरुद्ध इंदापूर पोलीस ठाण्यात गुन्हा दाखल करण्यात आला आहे.
तक्रारदार (वय 34) हे शेतकरी असून त्यांनी गट नं. 173/2 वरील जुने पीक कर्ज फेडल्यानंतर नवीन कर्ज मिळविण्यासाठी जय भवानी सोसायटीमार्फत प्रस्ताव सादर केला होता. या प्रस्तावावर कार्यवाही करण्यासाठी आरोपी सचिव नाना बोराटे यांनी सुरुवातीला 2 हजार रुपयांची लाच मागितल्याची तक्रार 8 एप्रिल रोजी एसीबीकडे दाखल झाली. तक्रारीनंतर एसीबीने तात्काळ पडताळणी कारवाई केली. 8 एप्रिल रोजी पुणे जिल्हा मध्यवर्ती सहकारी बँकेच्या इंदापूर शाखेत झालेल्या पडताळणीत नाना बोराटे यांनी 1 हजार रुपयांची लाच मागितल्याचे निष्पन्न झाले.
यानंतर 9 एप्रिल रोजी सापळा रचण्यात आला. पंधरवाडी येथील सोसायटीच्या आवारात आरोपीने तक्रारदाराकडून 1 हजार रुपयांची लाच स्वीकारताच दुपारी 12:19 वाजता एसीबीच्या पथकाने त्याला रंगेहात जेरबंद केले. ही कारवाई पोलीस निरीक्षक अविनाश धरबुडे यांच्या नेतृत्वाखाली करण्यात आली असून तपास पोलीस निरीक्षक शैलजा शिंदे करीत आहेत.
