Pune Crime : पुणे, ता. 30 : महापालिकेचा प्रॉपर्टी टॅक्स निम्मा करून देतो, उच्च अधिकाऱ्यांशी ओळख आहे, अशी थाप मारून एकाने हडपसर येथील रिक्षाचालकाची तब्बल 1 लाख 52 हजार रुपयांची आर्थिक फसवणूक केली आहे. तसेच बनावट ऑनलाईन पावत्या, बाऊन्स झालेले चेक आणि पैसे मागितल्यावर पोलिस ओळखींची धमकी देत जीवे मारण्याचा प्रकार समोर आला असून, या प्रकरणामुळे पुण्यातील दलालांचे साटेलोटे आणि सामान्य नागरिकांची लूट पुन्हा एकदा ऐरणीवर आली आहे.
सोहेल समीर जमादार (गंगा विलेज सोसायटी, हांडेवाडी पुणे) असे गुन्हा दाखल करण्यात आलेल्या आरोपीचे नाव आहे. याप्रकरणी रिक्षाचालक युनूस इकबाल खान (वय 51, रा. सय्यदनगर, हडपसर) यांनी वानवडी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, युनूस इकबाल खान यांचे एक गुंठा जागेत आर.सी.सी. बांधकाम केले असून, त्यावर महापालिकेचा प्रॉपर्टी टॅक्स थकीत होता. ही थकबाकी भरताना मित्र इमरान खान यांच्या माध्यमातून सोहेल समीर जमादार या व्यक्तीशी ओळख झाली. तो महापालिकेतील “सर्व मोठ्या साहेबांचा जवळचा”, वकील असून कर संकलन विभागात त्याचे रोजचे उठबस असल्याचा दावा करत होता.
वैदुवाडी, रामटेकडी येथील अॅड. अस्लम शेख यांच्या कार्यालयात भेट जुलै2023 मध्ये झाली. यावेळी सोहेल जमादारने मोबाईलवर ऑनलाईन थकबाकी दाखवून ती 3 लाख 46 हजार रुपये असल्याचे सांगत, “निम्मी करून देतो, सर्व टॅक्स नील होईल,” अशी बतावणी केली. यासाठी त्याने 1 लाख 52 हजार रुपये मागितले. त्यानंतर सदर रक्कम रोख स्वरूपात घेतली. यावेळी सोहेल जमादार व त्याचे वडील समीर जमादार उपस्थित होते.
दरम्यान, सप्टेंबर 2024 मध्ये सोहेल जमादारने ऑनलाईन टॅक्स कमी झाल्याची बनावट पावती मोबाईलवर दाखवून तिची प्रिंट युनूस खान यांना दिली. मात्र महिनाभरानंतर कर संकलन कार्यालयात चौकशी केली असता, टॅक्स कमी होण्याऐवजी तो वाढून 4 लाख 51 हजार 776 रुपये झाल्याचे स्पष्ट झाले. अधिकाऱ्यांनी दिलेली पावती बनावट असून चेक बाऊन्स झाल्याने कोणतीही रक्कम भरलेली नसल्याचे सांगितले.
फसवणूक उघड झाल्यानंतर पैसे मागितल्यावर सोहेल जमादारने टाळाटाळ सुरू केली. अखेर बँक ऑफ इंडिया, हडपसर शाखेचा 1 लाख 60 हजारांचा चेक दिला; मात्र तोही खात्यात रक्कम नसल्याने बाऊन्स झाला. नंतर थोडेथोडे करून केवळ 70 हजार रुपये परत केले.
उर्वरित रक्कम मागितल्यावर मात्र प्रकरण गंभीर वळणावर गेले. युनूस खान व त्यांच्या पत्नीला “मी कोण आहे माहित नाही का? माझे पोलिसांशी घनिष्ठ संबंध आहेत. पैसे देणार नाही. परत आलात तर हातपाय तोडीन, खोट्या केसमध्ये अडकवीन,” अशा शब्दांत धमकावण्यात आले. पत्नीसमोर धक्काबुक्की करत घराबाहेर हाकलून देण्यात आले.
युनूस इकबाल खान हे काळेपडळ पोलीस ठाण्यात तक्रार देण्यासाठी गेल्यावर तासन्तास थांबवून उडवाउडवीची उत्तरे देण्यात आली, असा आरोपही तक्रारीत करण्यात आला आहे. यानंतर प्रकरण प्रसारमाध्यमांकडे नेणार असल्याचे सांगितल्यावर गाडीची डिक्की दोन वेळा फोडण्यात आल्याचा संशय व्यक्त करण्यात आला आहे.
दरम्यान, सदर प्रकारातून महापालिकेच्या नावाखाली दलालांकडून सुरू असलेली फसवणूक, पोलिसी दबावाचा गैरवापर आणि सामान्य नागरिकांच्या सुरक्षिततेचा प्रश्न पुन्हा एकदा गंभीर बनला असून, संबंधित आरोपींवर कठोर कारवाईची मागणी होत आहे.
