पुणे : दिवाळीच्या काळात पुण्यातील कचऱ्याची समस्या गंभीर झाली असून पुणे महानगरपालिकेच्या स्वच्छता कर्मचाऱ्यांवर कामाचा अतिरिक्त ताण आला आहे. दसरा ते दिवाळी या सणांच्या काळात शहरातून दररोज तब्बल 2,800 ते 3,000 टन कचरा बाहेर पडत आहे. एरवी जमा होणाऱ्या कचऱ्याच्या तुलनेत हे प्रमाण खूपच जास्त असल्याने कचरा व्यवस्थापन यंत्रणेची मोठी कसरत होत आहे.
सामान्य दिवसांचा विचार केला तर पुणे शहरात रोज 2,200 ते 2,300 टन कचरा गोळा केला जातो. मात्र, सण-उत्सवाच्या काळात नागरिकांकडून घरोघरी मोठ्या प्रमाणावर स्वच्छता मोहीम राबवली जाते. जुन्या वस्तू, धूळ, कागद आणि इतर नको असलेले साहित्य बाहेर काढले जाते. तसेच घरांची सजावट, रोषणाई, रांगोळी आणि आकाशकंदील यामुळेही कचऱ्यात भर पडते. परिणामी, दररोज सुमारे 200 ते 300 टन अतिरिक्त कचरा रस्त्यावर आणि कचरा कुंड्यांमध्ये जमा होत आहे.
अचानक वाढलेल्या या अतिरिक्त कचऱ्याचे संकलन आणि वाहतूक करण्यासाठी महापालिकेला जादा फेऱ्या माराव्या लागत आहेत. गाड्यांची उपलब्धता, मनुष्यबळ आणि कचरा डेपोतील प्रक्रिया या सर्वांवरच याचा थेट परिणाम झाला आहे. सणाच्या आनंदात शहराचे सौंदर्य टिकवून ठेवण्यासाठी पालिका प्रशासन प्रयत्नशील आहे, परंतु वाढत्या कचऱ्यामुळे स्वच्छता कर्मचाऱ्यांची धावपळ होत आहे.
