नागपूर : शहरात दिवाळीच्या सणात एक अत्यंत दुर्दैवी आणि खळबळजनक घटना उघडकीस आली आहे. गडचिरोली जिल्ह्यातील सुरजागड येथे शिक्षक म्हणून काम करणाऱ्या एका नवविवाहित दाम्पत्याने गळफास घेऊन आपले आयुष्य संपवले. मनीष गणवीर आणि सोनाली गणवीर असे या मृत दांपत्याचे नाव आहे. दिवाळी साजरी करण्यासाठी हे दोघे नागपूरला आले होते.
बेलतरोडी पोलीस ठाण्याच्या हद्दीतील राहत्या घरात दोघांचे मृतदेह ओढणीच्या साहाय्याने गळफास घेतलेल्या अवस्थेत आढळले. सणाच्या निमित्ताने जेव्हा नातेवाईक त्यांना भेटण्यासाठी घरी पोहोचले, तेव्हा घराचा दरवाजा आतून बंद होता. संशय आल्याने पाहणी केली असता ही धक्कादायक बाब समोर आली.
मिळालेल्या माहितीनुसार, मनीष आणि सोनाली या दोघांचाही हा दुसरा विवाह होता. ऑगस्ट 2024 मध्येच त्यांनी पुनर्विवाह केला होता. लग्नाला अवघे काही महिने झाले असतानाच त्यांनी हे टोकाचे पाऊल उचलल्याने सर्वत्र हळहळ व्यक्त केली जात आहे.
या दोन्ही शिक्षकांनी आत्महत्या का केली, याचे नेमके कारण अद्याप समोर आलेले नाही. घटनास्थळी कोणतीही सुसाईड नोट सापडली आहे की नाही, याबाबत पोलीस तपास करत आहेत. सध्या पोलिसांनी आकस्मिक मृत्यूची नोंद केली आहे. हा खरोखरच आत्महत्येचा प्रकार आहे की यामागे काही घातपाताचा संशय आहे, या दोन्ही बाजूंचा विचार करून पोलीस पुढील कारवाई करत आहेत. या घटनेमुळे परिसरात तीव्र शोककळा पसरली आहे.
