बेळगाव : एका आईनेच आपल्या 24 वर्षांच्या मुलाची निर्घृण हत्या केल्याची धक्कादायक घटना उघडकीस आली आहे. स्वतःच्या अनैतिक संबंधांना विरोध करतो म्हणून आईने हे भयंकर पाऊल उचलल्याचे पोलीस तपासात स्पष्ट झाले आहे. या गुन्ह्याप्रकरणी पोलीस प्रशासनाने आईसह एकूण 6 आरोपींना अटक केली असून एका अल्पवयीन मुलालाही ताब्यात घेतले आहे.
विजय नारायण असे हत्या झालेल्या दुर्दैवी तरुणाचे नाव आहे. तो मालमारुती पोलीस ठाण्याच्या हद्दीत आपल्या कुटुंबासोबत राहत होता. विजयची आई मीना नारायण हिचे राकेश जामुनी नावाच्या व्यक्तीसोबत अनैतिक संबंध होते. मुलाला या नात्याबद्दल समजल्यानंतर त्याने त्याला तीव्र विरोध दर्शवला होता. या विरोधाचा राग मनात धरून मीनाने राकेशच्या मदतीने विजयचा काटा काढण्याचा कट रचला.
कारवाईच्या दिवशी राकेशने विजयला विश्वासात घेऊन कारमधून एका ठिकाणी नेले. तिथे इतर सहकाऱ्यांच्या मदतीने विजयला कोल्ड ड्रिंकमधून झोपेच्या गोळ्या देण्यात आल्या. औषधाच्या प्रभावामुळे विजय बेशुद्ध पडताच, आरोपींनी ओढणीच्या साहाय्याने त्याचा गळा आवळून खून केला.
हत्या केल्यानंतर सचिन कांबळे, मनोज कांबळे, तम्मण्णा कांबळे आणि एकनाथ कांबळे यांच्या मदतीने आरोपींनी मृतदेह राष्ट्रीय महामार्गाजवळील एका गटारात फेकून दिला आणि तिथून पळ काढला.
दरम्यान तीन नोव्हेंबर रोजी केएलई छत्री परिसरातील गटारात एक बेवारस मृतदेह आढळल्याने खळबळ उडाली होती. मालमारुती पोलिसांनी या प्रकरणी तात्काळ गुन्हा दाखल करून तपासाची चक्रे वेगाने फिरवली. अवघ्या काही दिवसांतच या हत्येचा उलगडा करत पोलिसांनी मुख्य सूत्रधार आईसह सर्व आरोपींच्या मुसक्या आवळल्या, अशी माहिती पोलीस आयुक्त प्रकाश निकम यांनी दिली
