Pune Crime : हडपसर, (पुणे) : पुणे – सोलापूर (Pune Solapur Express) महामार्गावरील कायम चर्चेत असलेल्या शेवाळवाडी (ता. हवेली) येथील जॉयव्हिले सोसायटीत राहणाऱ्या 36 वर्षीय तरुणाने एका 13 वर्षीय अल्पवयीन मुलीचा विनयभंग केल्याची घटना उघडकीस आली आहे. याप्रकरणी आरोपीवर मांजरी पोलीस ठाण्यात पोक्सोसह अॅट्रॉसिटीचा गुन्हा दाखल करण्यात आला आहे. ही घटना मंगळवारी (ता. 03) दुपारी सव्वा एक वाजता घडली.
पंकज पोपट ताकवले (वय 36, रा. जॉयव्हिले सोसायटी, हडपसर) असे आरोपीचे नाव आहे. त्याच्यावर मांजरी पोलीस ठाण्यात पोक्सो व अॅट्रॉसिटीचा गुन्हा दाखल करण्यात आला आहे. याप्रकरणी अल्पवयीन पीडित मुलीच्या आईने तक्रार दिली आहे.
मिळालेल्या माहितीनुसार, मंगळवारी धुलीवंदन निमित्ताने अल्पवयीन 13 वर्षांची मुलगी सोसायटीच्या आवारात मैत्रिणींसोबत रंग खेळल्यानंतर परिसरातील एका कॅफेमध्ये नाश्ता करण्यासाठी गेली होती. त्यावेळी सोसायटीतच राहणारा पंकज ताकवले हा कॅफेमध्ये येऊन मुलीशी बोलण्याचा प्रयत्न करू लागला. मुलीने प्रतिसाद दिला नाही, तरीही आरोपीने तिच्या खांद्यावर हात ठेवत पुन्हा तिच्याशी जवळीक साधण्याचा प्रयत्न केला. इतकेच नव्हे तर तिच्याशी अश्लील कृत्य केल्याचा आरोप करण्यात आला आहे.
घटनेनंतर मुलगी घरी परतल्यानंतर घाबरलेल्या अवस्थेत तिने आईला सर्व प्रकार सांगितला. त्यानंतर कुटुंबीयांनी सोसायटीतील सीसीटीव्ही फुटेज तपासले असता आरोपीचे संशयास्पद वर्तन दिसून आल्याचा दावा करण्यात आला आहे.
दरम्यान, याप्रकरणी आरोपी पंकज ताकवले याच्यावर भारतीय न्याय संहिता कलम 75 तसेच लैंगिक अपराधांपासून बालकांचे संरक्षण कायदा 2012 (पोक्सो) अंतर्गत कलम 8, 12 लागू करण्यात आले आहे. तसेच अनुसूचित जाती व जमाती (अत्याचार प्रतिबंधक) अधिनियम 1989 सुधारणा 2015 अंतर्गत कलम 3(1)(w)(i) व 3(2)(va) नुसारही गुन्हा नोंद करण्यात आला आहे.
या घटनास्थळी लोणी काळभोर विभागाच्या सहाय्यक पोलीस आयुक्त अनुराधा उदमले, हडपसर पोलीस ठाण्याचे पोलीस निरीक्षक निलेश जगदाळे (अतिरिक्त कार्यभार मांजरी पोलीस ठाणे), पोलीस उपनिरीक्षक अनिल बिनवडे यांनी भेट देऊन पाहणी केली. या घटनेचा पुढील तपास सहाय्यक पोलीस आयुक्त अनुराधा उदमले करीत आहेत.
