Bigg Boss Marathi 6 : मुंबई : बिग बॉस मराठीच्या सहाव्या सिझनमध्ये आता अंतिम टप्पा सुरू झाला असून फिनालेसाठी स्पर्धकांमध्ये चुरस वाढली आहे. घरातील प्रत्येक सदस्य अंतिम फेरीत पोहोचण्यासाठी प्रयत्न करताना दिसत आहे. या सिझनची पहिली फायनलिस्ट म्हणून तन्वी कोलते हिने आपले स्थान पक्के केले आहे. तिने तिकीट टू फिनाले हा महत्त्वाचा टास्क जिंकत थेट फिनालेमध्ये प्रवेश मिळवला आहे.
तन्वी फायनलमध्ये पोहोचल्यानंतर आता उर्वरित स्पर्धकांमध्ये टॉप 5 मध्ये स्थान मिळवण्यासाठी स्पर्धा अधिक तीव्र झाली आहे. सध्या घरात एकूण 7 स्पर्धक आहेत. यात तन्वी कोलतेसोबत दिपाली सय्यद, अनुश्री माने, रेवा कौरासे, विशाल कोटियन, राखी सावंत आणि राकेश बापट यांचा समावेश आहे. यापैकी कोण अंतिम फेरीत पोहोचणार याकडे प्रेक्षकांचे लक्ष लागले आहे.
दरम्यान, या आठवड्यातील नॉमिनेशन प्रक्रियेत 7 पैकी 5 स्पर्धक धोक्यात आले आहेत. यात राकेश बापट, अनुश्री माने, विशाल कोटियन, दिपाली सय्यद आणि राखी सावंत यांची नावे आहेत. आपल्या आवडत्या स्पर्धकाला वाचवण्यासाठी प्रेक्षकांना मतदानाची संधी देण्यात आली होती. ही वोटिंग लाईन 10 एप्रिल रोजी दुपारी 12 वाजता बंद करण्यात आली आहे.
आता शनिवार आणि रविवारच्या भागात ‘भाऊचा धक्का’ एपिसोडमध्ये या आठवड्यात कोणता स्पर्धक घराबाहेर जाणार याचा निर्णय होणार आहे. त्यामुळे घरातील सदस्यांसह प्रेक्षकांमध्येही उत्सुकता वाढली आहे. फिनाले जवळ येत असल्याने प्रत्येक क्षण महत्त्वाचा ठरत आहे.
