लोणी काळभोर : पुणे शहर, पिंपरी-चिंचवड पोलीस आयुक्तालय तसेच पुणे जिल्ह्यातून तब्बल दोन वर्षांसाठी हद्दपार केले असतानाही कोणतीही परवानगी न घेता लोणी काळभोर परिसरात फिरणाऱ्या हद्दपार तरुणाला गुन्हे शाखा युनिट-6 च्या पथकाने ताब्यात घेतले. ही कारवाई मंगळवारी (ता. 29 सप्टेंबर) सायंकाळी सहाच्या सुमारास लोणी काळभोर टोलनाका, द्राक्षबाग, पुणे-सोलापूर रस्त्यावर करण्यात आली.
आकाश संतोष भाले (वय 23, रा. गारुडी वस्ती, लोणी काळभोर पोलीस ठाण्यामागे) असे ताब्यात घेतलेल्या तरुणाचे नाव आहे. पोलिसांनी दिलेल्या माहितीनुसार, गुन्हे शाखा युनिट-6 चे पथक लोणी काळभोर पोलीस ठाण्याच्या हद्दीत गुन्हे प्रतिबंधक पेट्रोलिंग करीत होते. त्यावेळी पोलिसांच्या बातमीदारामार्फत हद्दपार आरोपी आकाश भाले हा लोणी काळभोर टोलनाका परिसरातील द्राक्षबाग येथे थांबला असल्याची माहिती पोलिसांना मिळाली. माहितीची खातरजमा करून कारवाई करण्याचे आदेश मिळाल्यानंतर पोलिसांचे पथक तत्काळ घटनास्थळी पोहोचले. त्यावेळी आकाश भाले संशयितरित्या उभा असल्याचे पोलिसांच्या निदर्शनास आले. पोलिसांना पाहताच त्याने तेथून निघून जाण्याचा प्रयत्न केला. मात्र, पोलिसांनी पाठलाग करून त्याला पकडले.
चौकशीदरम्यान त्याने आपले नाव आकाश भाले असल्याचे सांगितले. पोलिसांनी त्याच्याकडे हद्दपार क्षेत्रात प्रवेश करण्यासाठी न्यायालय अथवा पोलीस उपायुक्तांची परवानगी घेतली आहे का, अशी विचारणा केली. मात्र, त्याने कोणतीही परवानगी घेतली नसल्याचे सांगितले. यानंतर लोणी काळभोर पोलिसांकडून त्याच्या हद्दपारीच्या आदेशाची खातरजमा करण्यात आली. त्यावेळी पोलीस उपायुक्त, परिमंडळ-6 यांनी महाराष्ट्र पोलीस अधिनियम, 1951 मधील कलम 56 (1 )(37) अन्वये आकाश भाले याला पुणे शहर, पिंपरी-चिंचवड पोलीस आयुक्तालय आणि पुणे जिल्ह्यातून दोन वर्षांसाठी हद्दपार केल्याचे स्पष्ट झाले.
हद्दपार आदेशाचा भंग करून कोणतीही पूर्वपरवानगी न घेता लोणी काळभोरमध्ये प्रवेश केल्याप्रकरणी त्याच्याविरुद्ध महाराष्ट्र पोलीस अधिनियम कलम 142 अन्वये कारवाई करण्यात आली आहे. ही कारवाई गुन्हे शाखा युनिट-6चे पोलीस निरीक्षक संतोष शेटे यांच्या मार्गदर्शनाखाली करण्यात आली. पथकात संतोष कदम, आशिष जाधव, पोलीस हवालदार कर्णवर, देशमुख, महिला पोलीस हवालदार लोखंडे, पोलीस अंमलदार बांदल आदींचा समावेश होता.
