Pune Metro : पुणे : आयटी हब (IT Hub) म्हणून ओळखल्या जाणाऱ्या हिंजवडीला शहराच्या मध्यभागाशी जोडणाऱ्या हिंजवडी ते शिवाजीनगर मेट्रो मार्गाच्या कामाला वेग आला असून हा प्रकल्प अंतिम टप्प्यात पोहोचला आहे. सुमारे 23 किलोमीटर लांबीच्या या मेट्रो मार्गाचे जवळपास 94 टक्के काम पूर्ण झाले आहे. या मार्गावरील 13 स्थानके पूर्णपणे तयार झाली असून उर्वरित स्थानकांचे कामही शेवटच्या टप्प्यात असल्याची माहिती अधिकाऱ्यांनी दिली आहे.
हा महत्त्वाचा प्रकल्प पीएमआरडीए आणि पुणे आयटी सिटी मेट्रो रेल लिमिटेड यांच्या सहकार्याने राबवला जात आहे. या मार्गावर एकूण 23 स्थानके प्रस्तावित असून त्यापैकी 15 ते 17 स्थानकांचे 90 टक्क्यांपेक्षा अधिक काम पूर्ण झाले आहे. मेट्रो मार्गावरील तांत्रिक कामे आणि ट्रॅकची तपासणी सुरू असून सध्या चाचणी फेऱ्याही सुरू करण्यात आल्या आहेत. या चाचण्यांमधून मेट्रोची गती, सुरक्षितता आणि इतर तांत्रिक बाबी तपासल्या जात आहेत.
प्रशासनाने या प्रकल्पाचे काम एप्रिल 2026 पर्यंत पूर्ण करण्याचे उद्दिष्ट ठेवले आहे. मात्र प्रत्यक्ष सेवा सुरू करण्यापूर्वी कन्सेशनरकडून अंतिम मंजुरी मिळणे आवश्यक आहे. मंजुरी मिळाल्यानंतर संपूर्ण मार्ग सुरू करायचा की काही स्थानकांदरम्यान अंशत: सेवा सुरू करायची याबाबत निर्णय घेतला जाणार आहे.
हिंजवडी परिसरात मोठ्या प्रमाणात आयटी कंपन्या असल्यामुळे हजारो कर्मचारी दररोज प्रवास करतात. ही मेट्रो सेवा सुरू झाल्यानंतर त्यांचा प्रवास अधिक सोपा आणि जलद होण्याची शक्यता आहे. तसेच शिवाजीनगर येथे हा मार्ग पुणे मेट्रोच्या विद्यमान नेटवर्कला जोडला जाणार असल्याने शहरातील इतर भागात जाणेही सोयीचे होईल.
