पुणे: पुण्यात एका पोलीस उपनिरीक्षकाविरोधात लग्नाचे आमिष दाखवून तरुणीवर (Pune Crime) अत्याचार केल्याचा गंभीर आरोप समोर आला आहे. पीडित 31 वर्षीय तरुणीच्या तक्रारीनंतर वारजे पोलीस ठाण्यात संबंधित अधिकाऱ्याविरोधात गुन्हा दाखल करण्यात आला असून या घटनेमुळे खळबळ उडाली आहे. (Latest Marathi News)
गुन्हा दाखल झालेल्या आरोपीचे नाव स्वदेश विजय चव्हाण असून तो मुंबईतील कुरार पोलीस ठाण्यात उपनिरीक्षक म्हणून कार्यरत असल्याची माहिती आहे. पीडितेने आरोपीवर तात्काळ कारवाई करून अटक करण्याची मागणी केली आहे.
पोलिसांच्या माहितीनुसार, फेब्रुवारी 2024 मध्ये डेटिंग ॲपच्या माध्यमातून पीडित तरुणी आणि स्वदेश चव्हाण यांची ओळख झाली. त्यानंतर दोघांमध्ये जवळीक वाढली. मार्च 2024 मध्ये पहिली भेट झाल्यानंतर आरोपीने लग्नाचे आश्वासन देत तिच्यासोबत वारंवार शारीरिक संबंध ठेवल्याचा आरोप आहे.
मे 2024 मध्ये तरुणी गर्भवती राहिल्यानंतर आरोपीने लग्नाचे आश्वासन पुढे करत तिला गर्भपात करण्यास भाग पाडल्याचा आरोपही तक्रारीत करण्यात आला आहे. त्यानंतर आरोपीची पोलीस उपनिरीक्षक पदावर निवड झाली आणि त्याची मुंबईत नियुक्ती झाली.
दरम्यान, पीडित तरुणीने वारंवार लग्नाबाबत विचारणा केल्यानंतर आरोपी टाळाटाळ करत होता. अखेर मार्च 2026 मध्ये त्याने लग्नास स्पष्ट नकार दिल्याचे तक्रारीत नमूद करण्यात आले आहे. आपली फसवणूक झाल्याचे लक्षात आल्यानंतर तरुणीने पुण्यात येऊन वारजे पोलिसांकडे तक्रार दाखल केली.
या प्रकरणात वारजे पोलिसांनी गुन्हा दाखल करून तपास सुरू केला आहे. आरोपी पोलीस दलात कार्यरत असल्याने निष्पक्ष चौकशी आणि पुढील कारवाईकडे सर्वांचे लक्ष लागले आहे.
