पुणे: देशभरात चर्चेत असलेल्या नीट पेपरफुटी प्रकरणाच्या तपासात (NEET Paper Leak) महाराष्ट्रातील काही आर्थिक धागेदोरे समोर येत असल्याची माहिती पुढे आली आहे. या प्रकरणातील मुख्य आरोपी शिवराज मोटेगावकर (Shivajirao Motegaonkar) याच्या मालमत्तांबाबत तपास यंत्रणांकडून चौकशी सुरू असल्याचे समोर आले आहे. त्याच्या नावावर पुण्यातील मोक्याच्या ठिकाणी मोठी संपत्ती खरेदी झाल्याची माहिती मिळाल्याने तपास अधिक तीव्र झाला आहे. (Pune Crime)
मिळालेल्या माहितीनुसार, शिवराज मोटेगावकर याने 2023 मध्ये पुण्यातील वारजे परिसरात 51 गुंठे जमीन खरेदी केल्याची माहिती समोर आली आहे. ही जमीन मोक्याच्या ठिकाणी असून सध्याच्या बाजारभावानुसार तिची किंमत सुमारे 30 ते 40 कोटी रुपयांच्या घरात असल्याचे बोलले जात आहे. या व्यवहाराशी संबंधित कागदपत्रांची तपास यंत्रणांकडून पडताळणी केली जात आहे.
तपासादरम्यान मोटेगावकरच्या इतर मालमत्तांबाबतही माहिती समोर येत असल्याचे सांगितले जात आहे. त्याच्या आर्थिक व्यवहार, बँक खाती आणि रिअल इस्टेटमधील गुंतवणुकीची चौकशी सुरू असून निधीचा स्रोत काय होता, याचा शोध घेतला जात आहे.
दरम्यान, नीट पेपरफुटी प्रकरणाचा तपास केंद्रीय अन्वेषण विभाग करत आहे. या प्रकरणात आधीच काही आरोपी आणि संबंधित व्यक्तींची चौकशी सुरू असून आर्थिक व्यवहारांची साखळी तपासण्यावर भर दिला जात आहे. तपास पूर्ण झाल्यानंतरच यामागील नेमके आर्थिक व्यवहार आणि संबंधित बाबी स्पष्ट होणार आहेत.
