पुणे: लहानांपासून मोठ्यांपर्यंत सर्वांनाच आवडणाऱ्या ‘म्हातारीचे केस’ म्हणजेच कॉटन कँडीचा पिंपरी-चिंचवडमध्ये आता रंगच बदलला आहे. खाद्यपदार्थांमध्ये कृत्रिम रंगांच्या वापराबाबत अन्न व औषध प्रशासनाकडून (FDA) कडक भूमिका घेतली जात असल्याने विक्रेत्यांनी रंगीत कॉटन कँडीऐवजी पांढरी कॉटन कँडी तयार करण्यास सुरुवात केली आहे. त्यामुळे बाजारात नेहमी गुलाबी, निळ्या किंवा हिरव्या रंगात दिसणारी कॉटन कँडी आता पांढऱ्या रंगात दिसत आहे.
कॉटन कँडी मुख्यतः साखरेपासून तयार केली जाते. मशीनमध्ये साखर फिरवल्यानंतर तिचे बारीक तंतू तयार होतात आणि त्यांना कापसासारखा आकार देऊन ही कँडी विकली जाते. ग्राहकांना आकर्षित करण्यासाठी यामध्ये विविध कृत्रिम रंगांचा वापर केला जातो. मात्र, खाद्यपदार्थांमध्ये वापरल्या जाणाऱ्या रंगांबाबत सुरक्षिततेचा प्रश्न उपस्थित होत असल्याने प्रशासनाकडून वेळोवेळी तपासणी आणि आवश्यक सूचना दिल्या जातात.
पिंपरी-चिंचवडमध्ये FDA च्या सूचनांनंतर अनेक विक्रेत्यांनी कॉटन कँडीमध्ये रंग न वापरण्याचा निर्णय घेतला आहे. त्यामुळे पूर्वी आकर्षक रंगांमध्ये दिसणारी कॉटन कँडी आता चक्क पांढरी झाली असून, तिचे हे रूप ‘म्हातारीच्या केसां’सारखेच दिसत आहे. प्रशासनाच्या या भूमिकेचे काही नागरिकांकडून स्वागत केले जात आहे. मात्र, रंग नसलेली कॉटन कँडी पाहून काही ग्राहकांमध्ये कुतूहलही निर्माण झाले आहे.
कॉटन कँडीला लहान मुलांमध्ये विशेष पसंती असल्याने त्यामध्ये वापरल्या जाणाऱ्या घटकांबाबत पालकही अधिक जागरूक झाले आहेत. आकर्षक रंगापेक्षा खाद्यपदार्थ सुरक्षित असणे महत्त्वाचे असल्याचे विक्रेत्यांकडूनही सांगितले जात आहे. दरम्यान, पिंपरी-चिंचवड परिसरातील कॉटन कँडी विक्रीवर FDA प्रशासनाचे लक्ष असून, नियमांचे पालन करण्याच्या सूचना विक्रेत्यांना देण्यात येत आहेत. त्यामुळे सध्या पिंपरी-चिंचवडच्या बाजारपेठेत ‘रंगीत म्हातारीचे केस’ गायब होऊन पांढऱ्या कॉटन कँडीचीच चर्चा सुरू आहे.
