पुणे : नीट पेपरफुटी प्रकरण आणि विविध राष्ट्रीय स्तरावरील परीक्षांमधील कथित गैरव्यवहारांच्या निषेधार्थ कॉकरोच जनता पार्टीच्या वतीने पुण्यात मोठे आंदोलन करण्यात आले. केंद्रीय शिक्षणमंत्री धर्मेंद्र प्रधान यांनी नैतिक जबाबदारी स्वीकारून राजीनामा द्यावा, अशी मागणी आंदोलनकर्त्यांनी केली.
सावित्रीबाई फुले पुणे विद्यापीठ परिसरात झालेल्या या आंदोलनात कॉकरोच जनता पार्टीचे संस्थापक अभिजित दीपके यांच्यासह शिक्षण सुधारक आणि समाजसेवक सोनम वांगचुक उपस्थित होते. याशिवाय विविध क्षेत्रांतील मान्यवरांनीही आंदोलनाला पाठिंबा दर्शवत सहभाग नोंदवला.
या आंदोलनात मोठ्या संख्येने तरुण सहभागी झाले होते. विशेषतः स्पर्धा परीक्षा आणि उच्च शिक्षणाशी संबंधित विद्यार्थी मोठ्या प्रमाणात उपस्थित असल्याचे पाहायला मिळाले. विद्यार्थ्यांसोबतच ज्येष्ठ नागरिकांनीही आंदोलनात सहभाग घेत सरकारचे लक्ष शिक्षण क्षेत्रातील प्रश्नांकडे वेधण्याचा प्रयत्न केला.
आंदोलनकर्त्यांनी नीट परीक्षेतील कथित पेपरफुटी, सीबीएसई आणि इतर परीक्षांमधील गोंधळ याबाबत तीव्र नाराजी व्यक्त केली. या सर्व घटनांची जबाबदारी स्वीकारून केंद्रीय शिक्षणमंत्री धर्मेंद्र प्रधान यांनी पदाचा राजीनामा द्यावा, अशी प्रमुख मागणी यावेळी करण्यात आली.
कॉकरोच जनता पार्टीने यापूर्वी दिल्लीतील जंतर-मंतर येथेही अशाच स्वरूपाचे आंदोलन केले होते. त्या आंदोलनाला देशभरातील विद्यार्थी आणि पालकांचा प्रतिसाद मिळाला होता. त्यानंतर पुण्यातील आंदोलनाकडेही मोठे लक्ष लागले होते.
दरम्यान, पक्षाचे संस्थापक अभिजित दीपके यांनी 20 जून रोजी नवी दिल्ली येथे आणखी एक मोठे आंदोलन आयोजित करण्यात येणार असल्याची घोषणा केली. शिक्षण व्यवस्थेतील पारदर्शकता, परीक्षा प्रक्रियेतील सुधारणा आणि विद्यार्थ्यांच्या प्रश्नांसाठी लढा सुरूच राहील, असा निर्धार आंदोलनकर्त्यांनी व्यक्त केला.
