पुणे : मावळ तालुक्यातील इंदोरी येथील भंडारा डोंगर परिसरात 32 वर्षीय तरुणाने गळफास घेऊन आत्महत्या केल्याची धक्कादायक घटना समोर आली आहे. प्राथमिक चौकशीत हा तरुण बेरोजगारी आणि लग्न जमत नसल्याच्या मानसिक तणावात असल्याची माहिती समोर आली आहे.
मृत तरुणाचे नाव परमेश्वर रामेश्वर कुरे (वय 32) असे असून ते सध्या देहूगाव येथे राहत होते. ते मूळचे बीड जिल्ह्यातील माजलगाव तालुक्यातील आलापूर येथील रहिवासी होते.
पोलिसांनी दिलेल्या माहितीनुसार, भंडारा डोंगर परिसरातील एका झाडाला गळफास घेतलेल्या अवस्थेत त्यांचा मृतदेह आढळून आला. नागरिकांनी याची माहिती पोलिसांना दिल्यानंतर तळेगाव एमआयडीसी पोलिसांनी घटनास्थळी धाव घेत मृतदेह ताब्यात घेतला.
नातेवाईकांकडे केलेल्या चौकशीत परमेश्वर हे सुशिक्षित होते, मात्र त्यांना बराच काळ स्थिर आणि अपेक्षित नोकरी मिळत नव्हती, अशी माहिती समोर आली. रोजगार नसल्याने ते आर्थिक आणि मानसिक तणावाखाली होते. याशिवाय वय वाढत असतानाही विवाह जुळत नसल्याने ते अधिक चिंतेत होते.
नोकरी नसणे आणि वारंवार प्रयत्न करूनही लग्न न जुळणे या दोन्ही कारणांमुळे ते नैराश्यात गेले होते, असे नातेवाईकांनी पोलिसांना सांगितले. काही दिवसांपूर्वी त्यांनी आपल्या जवळच्या नातेवाईकांकडे आयुष्याबाबत निराशा व्यक्त केली होती, अशी माहितीही तपासात पुढे आली आहे.
या घटनेमुळे कुटुंबीयांवर दुःखाचा डोंगर कोसळला असून परिसरात हळहळ व्यक्त केली जात आहे. तळेगाव एमआयडीसी पोलिसांनी अकस्मात मृत्यूची नोंद केली असून पुढील तपास सुरू आहे.
