Mumbai Pune Express Accident: लोणावळा (पुणे) : यशवंतराव चव्हाण द्रुतगती महामार्गावर रविवारी सकाळी एक भीषण अपघात (Accident) घडला. मुंबई–पुणे (Mumbai Pune Express) एक्सप्रेसवेवरील अमृतांजन पुलाजवळ पुण्याहून मुंबईकडे लोखंडी प्लेट घेऊन जाणारा एक अवजड ट्रक अचानक पलटी झाला. या घटनेमुळे महामार्गावर एकच खळबळ उडाली असून मुंबईकडे जाणाऱ्या मार्गावर मोठ्या प्रमाणात वाहतूक कोंडी निर्माण झाली आहे.
मिळालेल्या माहितीनुसार, ट्रक चालकाचे वाहनावरील नियंत्रण सुटल्याने हा अपघात घडला. ट्रक पलटी झाल्याने रस्त्याच्या मधोमध अडथळा निर्माण झाला आणि मुंबईकडे जाणाऱ्या लेनवर वाहनांच्या लांबच लांब रांगा लागल्या. अपघाताची माहिती मिळताच महामार्ग पोलीस तातडीने घटनास्थळी दाखल झाले. पोलिसांनी परिस्थितीचा आढावा घेत अवजड क्रेनच्या सहाय्याने अपघातग्रस्त ट्रक बाजूला करण्याचे काम सुरू केले आहे.
गेल्या सुमारे दीड तासापासून ट्रक हटवण्याचे काम सुरू असून, यामुळे वाहतूक पूर्णपणे पूर्ववत होण्यास विलंब होत आहे. सध्या मुंबईच्या दिशेने सुमारे तीन किलोमीटरपर्यंत वाहतूक कोंडी झाली आहे. रविवारी सुट्टीचा दिवस असल्याने मुंबई–पुणे एक्सप्रेसवेवर नेहमीपेक्षा अधिक वाहने असतात. अनेक नागरिक लोणावळा आणि खंडाळा परिसरात पर्यटनासाठी जात असल्याने महामार्गावर मोठी गर्दी पाहायला मिळते.
अपघातामुळे अनेक प्रवासी आणि पर्यटक वाहतूक कोंडीत अडकून पडले आहेत. काही वाहनचालकांना बराच वेळ महामार्गावर थांबावे लागत आहे. पोलिसांकडून वाहनचालकांना संयम बाळगण्याचे आणि पर्यायी मार्गांचा वापर करण्याचे आवाहन करण्यात आले आहे. सुदैवाने या अपघातात कोणतीही जीवितहानी झाल्याची माहिती नाही. मात्र अपघातामुळे झालेल्या वाहतूक कोंडीमुळे प्रवाशांना मोठा मनस्ताप सहन करावा लागत आहे. पोलिसांकडून परिस्थिती नियंत्रणात आणण्याचे प्रयत्न सुरू असून लवकरच वाहतूक सुरळीत होईल, अशी माहिती देण्यात आली आहे.
