पुणे : घरफोडी करणाऱ्या परप्रांतीय चोरट्याला आंबेगाव पोलिसांनी अटक केली आहे. हा चोरटा विद्यार्थी वसतिगृहात राहून घरफोडी करायचा. चोरट्याकडून कडून 2 लाख 27 हजार रुपयांचा ऐवज जप्त करण्यात आला आहे. चोरट्याने आंबेगाव, बावधन, लोणीकंद परिसरात घरफोडीचे गुन्हे केल्याचे तपासात उघडकीस आले आहे. व्यंकटेश रमेश (वय 22 वर्षे, रा. पी.जी. बिल्डिंग, एमआयटी महाविद्यालयाजवळ, कोथरूड, मूळ रा. बंगळुरू, कर्नाटक) असे अटक करण्यात आलेल्याचे नाव आहे.
याबाबत अधिक माहिती अशी की, 17 मार्च रोजी कात्रज भागातील आंबेगाव बुद्रुक परिसरात भरदिवसा एका सदनिकेचे कुलूप तोडून सोन्याचे दागिने आणि रोकड चोरून नेल्याची घटना घडली होती. याप्रकरणी आंबेगाव पोलीस ठाण्यात गुन्हा दाखल करण्यात आला होता. पोलिसांनी परिसरातील सीसीटीव्ही कॅमेऱ्यांचे चित्रीकरण तपासले. यावरून तपास करुन पोलिसांनी रमेश याला ताब्यात घेतले. त्यानंतर केलेल्या चौकशीत त्याने आंबेगाव, लोणीकंद आणि बावधन भागात घरफोडी केल्याची कबुली दिली. आरोपी रमेश हा मूळचा बंगळुरूतील रहिवाशी आहे. आरोपी कोथरूड भागातील एका खासगी वसतिगृहात राहून घरफोडी करत होता. आरोपीने आणखी काही गुन्हे केल्याची शक्यता आहे. त्यादृष्टीने तपास करण्यात येत असल्याची माहिती वरिष्ठ पोलीस निरीक्षक शरद झिने यांनी दिली.
सदरची कामगिरी परिमंडळ दोनच्या पोलीस उपायुक्त स्मार्तना पाटील, सहायक आयुक्त राहुल आवारे यांच्या मार्गदर्शनाखाली आंबेगाव पोलीस ठाण्याचे वरिष्ठ पोलीस निरीक्षक शरद झिने, उपनिरीक्षक माेहन कळमकर, पोलीस कर्मचारी शैलेंद्र साठे, हनुमंत मासाळ, चेतन गोरे, निलेश जमदाडे, धनाजी धोत्रे, प्रमोद भोसले, नितीन कातुर्डे यांनी केली.
