पुणे: पुण्याच्या सार्वजनिक वाहतुकीत क्रांती घडवून आणल्यानंतर, महामेट्रोने आता खवय्यांसाठी एक अनोखी भेट आणली आहे. जिल्हा न्यायालय मेट्रो स्थानकाच्या परिसरात आता चक्क मेट्रोच्या डब्यात बसून, वातानुकूलित (AC) वातावरणात जेवणाचा आनंद घेता येणार आहे. ‘मेट्रो कोच रेस्टॉरंट’ नावाचा हा अभिनव प्रयोग आता प्रत्यक्ष साकारला असून त्याचे काम पूर्ण झाले आहे.
महामेट्रोला केवळ तिकिटांमधून मिळणाऱ्या उत्पन्नावर अवलंबून न राहता, उत्पन्नाचे इतर स्रोत शोधायचे होते. यातूनच ‘कोच रेस्टॉरंट’ची कल्पना पुढे आली. टिटागड कंपनीने दिलेल्या मेट्रोच्या एका जुन्या मॉडेल कोचचे रूपांतर एका आलिशान आणि आकर्षक रेस्टॉरंटमध्ये करण्यात आले आहे. हे रेस्टॉरंट जिल्हा न्यायालय स्थानकाजवळील कौटुंबिक न्यायालयाच्या (Family Court) परिसरात अतिशय कल्पकतेने उभारण्यात आले असून, लवकरच ते खवय्यांसाठी खुले होईल.
रोजचा धावपळीचा प्रवास करणाऱ्या पुणेकरांना आणि पर्यटकांना मेट्रोच्या डब्यात बसून जेवण्याचा एक वेगळा अनुभव मिळेल. हे रेस्टॉरंट केवळ श्रीमंतांसाठी नसून, सामान्य प्रवाशांना परवडतील अशा दरात येथे दर्जेदार खाद्यपदार्थ उपलब्ध करून दिले जाणार आहेत.
जिल्हा न्यायालय स्थानकावर प्रवाशांची मोठी वर्दळ असते. जे प्रवासी कामासाठी किंवा फिरण्यासाठी या भागात येतात, त्यांच्यासाठी हे ‘कोच रेस्टॉरंट’ एक उत्तम हँगआउट स्पॉट ठरेल. निविदा प्रक्रिया अंतिम टप्प्यात असून, येत्या काही दिवसांतच हे रेस्टॉरंट पूर्ण क्षमतेने सुरू होईल.
