पुणे : मराठा आरक्षणाच्या मुद्द्यावरून राज्यभरातील आंदोलनाची तीव्रता वाढत असतानाच पुण्यात मराठा आंदोलकांनी मुख्यमंत्री देवेंद्र फडणवीस यांना घेराव घालण्याचा प्रयत्न केल्याची घटना घडली. केंद्रीय राज्यमंत्री मुरलीधर मोहोळ यांच्या निवासस्थानी मुख्यमंत्री गणेश दर्शनासाठी आले असताना हा प्रकार घडला.

मिळालेल्या माहितीनुसार, मुख्यमंत्री देवेंद्र फडणवीस हे केंद्रीय राज्यमंत्री मुरलीधर मोहोळ यांच्या निवासस्थानी गणपतीच्या दर्शनासाठी आले होते. मुख्यमंत्री निवासस्थानी असल्याची माहिती मिळाल्यानंतर काही मराठा आंदोलक तेथे पोहोचले. त्यांनी मुख्यमंत्र्यांच्या विरोधात जोरदार घोषणाबाजी करण्यास सुरुवात केली.
यावेळी आंदोलकांनी मुख्यमंत्र्यांना घेराव घालण्याचा प्रयत्न केल्याने परिसरात काही काळ गोंधळाचे वातावरण निर्माण झाले. परिस्थिती लक्षात घेऊन पोलिसांनी तातडीने हस्तक्षेप केला. सुरुवातीला पोलिसांनी आंदोलकांना समजावून सांगण्याचा प्रयत्न केला आणि शांतता राखण्याचे आवाहन केले.

मात्र, आंदोलकांकडून घोषणाबाजी सुरूच राहिल्याने पोलिसांनी काही आंदोलकांना ताब्यात घेतले. त्यानंतर परिस्थिती नियंत्रणात आली. या घटनेमुळे गणेशोत्सवाच्या पार्श्वभूमीवर पुण्यातील राजकीय वातावरणातही काही काळ तणाव निर्माण झाला.
दरम्यान, मनोज जरांगे पाटील हे मराठा आरक्षणाच्या मागणीसाठी मुंबईच्या दिशेने निघाले असताना राज्यातील विविध भागांमध्ये मराठा समाजाकडून आंदोलन आणि सरकारविरोधात निदर्शने केली जात आहेत. त्याच पार्श्वभूमीवर पुण्यात मुख्यमंत्री देवेंद्र फडणवीस यांच्या उपस्थितीत घडलेल्या या प्रकाराकडे राजकीय वर्तुळाचे लक्ष लागले आहे.







