पुणे: पुण्यातील कसबा विधानसभा मतदारसंघात राजकीय घडामोडींना वेग आला आहे. शिवसेना (शिंदे गट) नेते आणि माजी आमदार रवींद्र धंगेकर यांच्या कसबा मतदारसंघात भाजपने ‘मिशन कसबा’ सुरू केल्याचे चित्र आहे. कसबा मतदारसंघातील शिवसेनेच्या प्रमुख पदाधिकारी वैष्णवी किराड या आज मंत्री चंद्रकांत पाटील यांच्या उपस्थितीत आणि स्मिता पाटील यांच्या मार्गदर्शनाखाली भाजपमध्ये प्रवेश करणार आहेत.
वैष्णवी किराड यांच्यासोबत शिवसेनेचे इतर पदाधिकारी तसेच मनसेचे काही कार्यकर्तेही भाजपमध्ये प्रवेश करणार असल्याची माहिती समोर आली आहे. त्यामुळे कसबा मतदारसंघात भाजपची संघटनात्मक ताकद वाढण्याची शक्यता व्यक्त केली जात आहे.
वैष्णवी किराड यांनी यापूर्वी शिवसेनेकडून महानगरपालिका निवडणूक लढवली आहे. किराड समाजातील प्रमुख चेहरा म्हणून त्यांची ओळख असून कसबा परिसरात त्यांचा प्रभाव असल्याचे बोलले जाते. त्यांच्या भाजप प्रवेशामुळे आगामी राजकीय समीकरणांवर परिणाम होण्याची शक्यता आहे.
रवींद्र धंगेकर यांनी शिवसेनेत प्रवेश केल्यानंतर भाजप नेते चंद्रकांत पाटील आणि समीर पाटील यांच्यावर विविध आरोप केले होते. त्यानंतर समीर पाटील यांनी पुराव्यांशिवाय आरोप करू नयेत, यासाठी न्यायालयातून स्थगिती आदेश मिळवला होता.
या पार्श्वभूमीवर भाजपकडून कसबा मतदारसंघात संघटनात्मक बांधणीला वेग देण्यात येत असून, वैष्णवी किराड यांचा भाजप प्रवेश हा धंगेकर आणि शिवसेना (शिंदे गट) यांच्यासाठी राजकीय धक्का मानला जात आहे. आगामी निवडणुकांच्या पार्श्वभूमीवर कसब्यातील राजकीय समीकरणे आता अधिक रंगतदार होण्याची शक्यता आहे.
