पुणे : बालेवाडीतील मैदानात कारमध्ये बसून मद्यपान करणाऱ्या दोघांना ‘ही दारू पिण्याची जागा नाही’ असे सांगितल्याच्या रागातून महिलेच्या अंगावर कार घालून तिला जखमी केल्याचा प्रकार समोर आला आहे. या प्रकरणी बाणेर पोलिसांनी कारचालकासह दोघांना अटक केली आहे. दिनेश दशरथ बिरादार (वय २३) आणि प्रशांत नवनाथ भोंडवे (वय २५), अशी अटक करण्यात आलेल्या आरोपींची नावे असून, दोघेही बालेवाडी परिसरातील रहिवासी आहेत.
या प्रकरणी मनीषा संजय भंडारी (वय ४६) यांनी बाणेर पोलीस ठाण्यात फिर्याद दिली आहे. १६ सप्टेंबर रोजी रात्री साडेआठच्या सुमारास त्या आपल्या श्वानाला फिरवण्यासाठी बालेवाडीतील दसरा चौक परिसरातील मैदानात गेल्या होत्या. त्यावेळी बिरादार आणि भोंडवे हे कारमध्ये बसले होते. भंडारी यांचा श्वान कारजवळ गेल्यानंतर आरोपींनी श्वान चावतो का, अशी विचारणा केली. त्यावर भंडारी यांनी श्वान चावत नसल्याचे सांगितले.
यानंतर भंडारी यांनी कारमध्ये दोघे मद्यपान करत असल्याचे पाहिले. त्यांनी ‘ही दारू पिण्याची जागा नाही’, असे सांगून श्वानाला घेऊन मैदानात फेरफटका मारण्यासाठी गेल्या. काही वेळाने परतल्यानंतर त्या जवळील कार्यालयाजवळ बसल्या होत्या. त्यावेळी कारमध्ये बसलेले दोघे मोठ्या आवाजात गाणी ऐकत असल्याचे त्यांच्या निदर्शनास आले.
फिर्यादीनुसार, त्यानंतर आरोपींनी कार त्यांच्या अंगावर घातली. कारची जोरदार धडक बसल्याने भंडारी यांच्या हाताला आणि पायाला गंभीर दुखापत झाली. कारमधील प्रशांत भोंडवे याने शिवीगाळ करून धमकी दिल्याचाही आरोप फिर्यादीत करण्यात आला आहे.
या प्रकरणी पोलिसांनी दोन्ही आरोपींविरुद्ध खुनाचा प्रयत्न तसेच मोटार वाहन कायद्यातील संबंधित कलमांनुसार गुन्हा दाखल करून त्यांना अटक केली आहे. या घटनेचा पुढील तपास सहायक पोलीस निरीक्षक अनिल केकाणे करीत आहेत.
