पुणे : बुधवार पेठेतील सपना बिल्डिंगमध्ये सुरू असलेल्या कथित देहविक्रीच्या अड्ड्यावर गुन्हे शाखेच्या अनैतिक मानवी वाहतूक प्रतिबंधक कक्षाने छापा टाकला. या कारवाईत दोन बांगलादेशी पीडित तरुणींची सुटका करण्यात आली असून, अड्डा चालवणाऱ्या एका बांगलादेशी महिलेसह तिच्या साथीदाराला पोलिसांनी अटक केली आहे.
बुधवार पेठेतील सपना बिल्डिंगमध्ये बांगलादेशी महिलांना डांबून ठेवून त्यांच्याकडून जबरदस्तीने देहविक्री करून घेतली जात असल्याची माहिती गुन्हे शाखेला मिळाली होती. या माहितीची खातरजमा करण्यासाठी पोलिसांनी सापळा रचला. एका पोलीस कर्मचाऱ्याला बनावट ग्राहक म्हणून अड्ड्यावर पाठवण्यात आले.
व्यवहार निश्चित झाल्यानंतर आणि तेथे बांगलादेशी महिला असल्याची खात्री होताच बनावट ग्राहकाने बाहेर थांबलेल्या पोलीस पथकाला इशारा केला. त्यानंतर पोलिसांनी अचानक छापा टाकून परिसराची झडती घेतली.
या कारवाईत दोन बांगलादेशी पीडित तरुणींची सुटका करण्यात आली. तसेच देहविक्रीचा अड्डा चालवणाऱ्या ३९ वर्षीय बांगलादेशी महिलेसह तिचा साथीदार रणजित गदाधर पात्रा (वय ४२) याला अटक करण्यात आली.
प्राथमिक तपासात या महिलांना बांगलादेशातून भारतात आणून पुण्यात देहविक्रीच्या व्यवसायात ढकलण्यात आल्याची माहिती समोर आली आहे. या प्रकरणामागे आंतरराष्ट्रीय मानवी तस्करीचे जाळे आहे का, याचा तपास पोलीस करत आहेत.
