पुणे : विमाननगर परिसरातील एका दुकानात बेकायदेशीरपणे प्रतिबंधित ई-सिगारेट आणि हुक्का फ्लेवरची विक्री होत असल्याची माहिती मिळाल्यानंतर विमानतळ पोलिसांनी छापा टाकून मोठी कारवाई केली. या कारवाईत 1.57 लाख रुपये किमतीचा मुद्देमाल जप्त करण्यात आला असून दुकान चालकाला अटक करण्यात आली आहे. तसेच दुकान मालकाविरुद्धही गुन्हा दाखल करण्यात आला आहे.
अटक करण्यात आलेल्या आरोपीचे नाव मोहम्मद फाईज फारुख शेख (वय 22) असे आहे. तो सध्या बालेवाडी येथील स्पर्श व्हिला परिसरात राहत असून मूळचा केरळ राज्यातील कासारगोड जिल्ह्यातील रहिवासी आहे. या प्रकरणात दुकानाचा मालक मोहम्मद शरीफ याच्याविरुद्धही गुन्हा नोंदविण्यात आला असून त्याचा शोध सुरू आहे.
पोलीस अंमलदार राहुल जोशी यांनी याबाबत विमानतळ पोलीस ठाण्यात फिर्याद दिली आहे. पोलिसांना मिळालेल्या माहितीनुसार, विमाननगरमधील निको गार्डन परिसरातील ‘स्मोक हेवन’ या दुकानात प्रतिबंधित ई-सिगारेट आणि विविध प्रकारचे हुक्का फ्लेवर विकले जात होते.
माहितीची खातरजमा केल्यानंतर 8 जून रोजी सायंकाळी पोलिसांनी दुकानावर छापा टाकला. कारवाईदरम्यान दुकानात उपस्थित असलेल्या मोहम्मद शेख याला ताब्यात घेण्यात आले. झडतीदरम्यान दुकानातून मोठ्या प्रमाणात ई-सिगारेट, हुक्का फ्लेवर आणि संबंधित साहित्य आढळून आले. पोलिसांनी एकूण 1 लाख 57 हजार रुपये किमतीचा मुद्देमाल जप्त केला.
या प्रकरणाचा पुढील तपास पोलीस उपनिरीक्षक नवनाथ क्षीरसागर करीत आहेत.
ही कारवाई अपर पोलीस आयुक्त मनोज पाटील, पोलीस उपायुक्त प्रशांत अमृतकर आणि सहाय्यक पोलीस आयुक्त नुतन पवार यांच्या मार्गदर्शनाखाली करण्यात आली. वरिष्ठ पोलीस निरीक्षक गोविंद जाधव आणि पोलीस निरीक्षक महेश बोलके यांच्या सूचनेनुसार पोलीस उपनिरीक्षक नितीन राठोड तसेच लालु कहे, राहुल जोशी, रुपेश पिसाळ, योगेश थोपटे, सचिन मांजरे, अंबादास चव्हाण, दिगंबर गोरे, राजीव टोम्पे, प्रशांत सुतार, आशा धादवड आणि सना शेख यांनी या कारवाईत सहभाग घेतला.
