पुणे : आगामी मराठी चित्रपट ‘कपबशी’च्या प्रमोशनसाठी प्रवास करत असताना चित्रपटाच्या कलाकारांच्या गाडीचा अपघात झाल्याची घटना समोर आली आहे. सुदैवाने या अपघातात कोणतीही जीवितहानी झाली नसून सर्वजण सुरक्षित असल्याची माहिती मिळाली आहे.
माहितीनुसार, अभिनेत्री पूजा सावंत, अभिनेता ऋषी मनोहर आणि चित्रपटाचे प्रसिद्धी प्रमुख दर्शन मुसळे हे चित्रपटाच्या प्रचारासाठी पुण्याहून सांगलीकडे जात होते. दरम्यान, सातारा जिल्ह्यातील काशीळ परिसरात त्यांच्या वाहनासह तीन गाड्यांची धडक झाली आणि अपघात घडला.
अपघातानंतर काही काळ घटनास्थळी गोंधळाचे वातावरण निर्माण झाले होते. धडकेमुळे वाहनांचे नुकसान झाले असले तरी गाडीत प्रवास करणारे सर्वजण सुखरूप बचावले. काहींना किरकोळ दुखापत आणि मुका मार लागला असून कोणालाही गंभीर इजा झालेली नाही.
घटनेची माहिती मिळताच स्थानिक नागरिक आणि संबंधित यंत्रणांनी तातडीने घटनास्थळी धाव घेत मदतकार्य सुरू केले. जखमींची विचारपूस करण्यात आली तसेच वाहतूक सुरळीत करण्यासाठी आवश्यक उपाययोजना करण्यात आल्या.
या अपघातामुळे चित्रपटाच्या टीममध्ये काही काळ चिंतेचे वातावरण निर्माण झाले होते. मात्र सर्वजण सुरक्षित असल्याने मोठा अनर्थ टळल्याची भावना व्यक्त करण्यात येत आहे. अपघाताचे नेमके कारण काय होते, याबाबत अधिक माहिती समोर आलेली नाही.
