पुणे : भाच्याच्या आवाजात फोन करून दुबई आणि जपानला जाण्यासाठी पैशांची गरज असल्याचे सांगत सायबर चोरट्यांनी एका ५८ वर्षीय नागरिकाची तब्बल ७ लाख ९९ हजार ९९९ रुपयांची फसवणूक केली. भाचा असल्याचा विश्वास संपादन करून आरोपींनी वेगवेगळ्या बँक खात्यांमध्ये पैसे जमा करण्यास सांगितले. या प्रकरणी फुरसुंगी पोलिसांकडून तपास सुरू आहे.
पोलिसांनी दिलेल्या माहितीनुसार, आरोपींनी फिर्यादी नागरिकांशी त्यांच्या भाच्याच्या आवाजात संपर्क साधला. दुबई आणि जपानला जाण्यासाठी पैशांची आवश्यकता असल्याचे सांगून त्यांनी आर्थिक मदत मागितली.
फोनवरील आवाज ओळखीचा वाटल्याने फिर्यादींचा आरोपींवर विश्वास बसला. त्यानंतर आरोपींनी सांगितलेल्या वेगवेगळ्या बँक खात्यांमध्ये त्यांनी वेळोवेळी पैसे पाठवले.
आरोपींनी अशा प्रकारे फिर्यादींकडून एकूण ७ लाख ९९ हजार ९९९ रुपये उकळले. आपली फसवणूक झाल्याचे लक्षात आल्यानंतर या प्रकरणाची तक्रार करण्यात आली. याप्रकरणी फुरसुंगी पोलीस पुढील तपास करीत आहेत.
