पुणे: दिघी आणि रांजणगाव परिसरात पोलिसांवर गोळीबार करून फरार झालेल्या तसेच 70 हून अधिक चोरीच्या गुन्ह्यांमध्ये सहभागी असलेल्या एका सराईत गुन्हेगाराला पुणे पोलिसांच्या मालमत्ता गुन्हे विरोधी पथकाने अटक केली आहे. शेखर संभाजी जाधव (वय 25, रा. मोधा, ता. उदगीर, जि. लातूर) असे अटक करण्यात आलेल्या आरोपीचे नाव आहे.
13 मे 2026 रोजी दिघी परिसरात पोलिसांवर गोळीबार करून शेखर जाधव आणि त्याचे 3 साथीदार पसार झाले होते. या घटनेनंतर दिघी पोलीस ठाण्यात त्यांच्याविरुद्ध खुनाचा प्रयत्न केल्याप्रकरणी गुन्हा दाखल करण्यात आला होता. तपासादरम्यान आरोपी रांजणगाव परिसरात असल्याची माहिती पोलिसांना मिळाली. त्यानुसार 16 मे रोजी गुन्हे शाखेचे पथक तेथे पोहोचले.
रांजणगाव येथे पोलिसांनी शेखर जाधव आणि त्याचा साथीदार मुस्तफा उर्फ भाईजान यांचा पाठलाग केला. मात्र, आरोपींनी पुन्हा पोलिसांवर गोळीबार करत उसाच्या शेताचा आधार घेत घटनास्थळावरून पळ काढला. या प्रकरणी रांजणगाव पोलीस ठाण्यातही स्वतंत्र गुन्हा दाखल करण्यात आला.
यानंतर मालमत्ता गुन्हे विरोधी पथकाचे वरिष्ठ पोलीस निरीक्षक संजय चव्हाण यांच्या मार्गदर्शनाखाली विशेष शोधमोहीम राबविण्यात आली. पोलिसांनी नांदेड, हिंगोली आणि लातूर जिल्ह्यांत अनेक वेळा जाऊन तपास केला. तसेच गोपनीय माहितीदारांच्या मदतीने आरोपीचा माग काढण्यात आला.
अखेर मिळालेल्या माहितीच्या आधारे 14 जून रोजी दिघी येथील मोझे शाळेजवळ सापळा रचून शेखर जाधव याला ताब्यात घेण्यात आले. अटकेदरम्यान त्याच्याकडून एक पिस्टल आणि एक जिवंत काडतूस जप्त करण्यात आले.
ही कारवाई अपर पोलीस आयुक्त सारंग आवाड, पोलीस उपायुक्त रोहिदास पवार आणि सहायक पोलीस आयुक्त डॉ. विशाल हिरे यांच्या मार्गदर्शनाखाली मालमत्ता गुन्हे विरोधी पथकाने केली.
