पुणे: पुणे आणि आसपासच्या प्रवाशांसाठी आगामी काळात विमानतळ प्रवास अधिक वेगवान आणि सोयीस्कर होण्याची शक्यता आहे. पुरंदर येथे प्रस्तावित छत्रपती संभाजीराजे आंतरराष्ट्रीय विमानतळासाठी शहरातून जलद आणि थेट संपर्क निर्माण करण्याच्या दृष्टीने प्रशासनाकडून महत्त्वाच्या पर्यायांचा विचार सुरू आहे. यामध्ये हडपसर ते पुरंदर विमानतळादरम्यान सुमारे १० किलोमीटर लांबीचा दुहेरी बोगदा उभारण्याचा प्रस्ताव चर्चेत आहे.
पुण्यातील लोहगाव विमानतळावर वाढणारा प्रवासी आणि विमान वाहतुकीचा ताण लक्षात घेता पुरंदर येथे नवीन आंतरराष्ट्रीय विमानतळ उभारण्याची योजना आहे. या विमानतळामुळे पुण्याची भविष्यातील विमान वाहतूक क्षमता वाढण्याची अपेक्षा आहे. मात्र, विमानतळापर्यंत पोहोचण्यासाठी सक्षम वाहतूक व्यवस्था उभारणेही तितकेच महत्त्वाचे आहे. त्यामुळे हडपसरकडून थेट पुरंदर विमानतळाशी जोडणाऱ्या बोगद्याचा पर्याय पुढे आला आहे.
या प्रस्तावित बोगद्याचे वैशिष्ट्य म्हणजे त्यामध्ये दोन स्वतंत्र वाहतूक व्यवस्था असणार आहेत. एका मार्गावर मेट्रोची वाहतूक करण्याचा विचार असून, दुसऱ्या मार्गावर खासगी आणि इतर वाहनांसाठी रस्ता उपलब्ध करून दिला जाणार आहे. हा बोगदा पुणे-सासवड मार्गावरील दिवे घाटाच्या खालून जाण्याची शक्यता आहे. त्यामुळे घाटातील वाहतुकीचा अडथळा टाळून पुणे शहरातून विमानतळापर्यंतचा प्रवास अधिक जलद होऊ शकतो.
या प्रकल्पासाठी योग्य सल्लागाराची नियुक्ती करण्याची प्रक्रिया सुरू असल्याचे सांगण्यात येत आहे. सल्लागार नियुक्त झाल्यानंतर बोगद्याच्या मार्गाचे सर्वेक्षण, तांत्रिक अभ्यास आणि सविस्तर आराखडा तयार केला जाणार आहे. या प्रक्रियेला साधारण सहा ते आठ महिने लागू शकतात. त्यानंतर बोगद्याची सुरुवात आणि शेवटचे ठिकाण तसेच त्याचा अंतिम मार्ग स्पष्ट होईल.
या प्रकल्पाचा आराखडा तयार करण्याची जबाबदारी महामेट्रोकडे असण्याची शक्यता आहे. मात्र, प्रत्यक्ष बांधकामाची अंमलबजावणी कोणत्या सरकारी यंत्रणेमार्फत केली जाणार, हे अद्याप निश्चित झालेले नाही. महाराष्ट्र राज्य रस्ते विकास महामंडळ किंवा महाराष्ट्र राज्य पायाभूत सुविधा विकास महामंडळ यापैकी एका यंत्रणेकडे प्रकल्पाची जबाबदारी सोपवली जाण्याची शक्यता आहे. हा प्रकल्प प्रत्यक्षात आल्यास पुणे शहर आणि पुरंदर विमानतळादरम्यानचा प्रवास अधिक वेगवान होण्यासोबतच शहरातील वाहतुकीवरील ताण कमी करण्यासही मदत होऊ शकते.
