पुणे: पुण्यात सुरू असलेल्या भाजपच्या प्रदेश कार्यकारिणी बैठकीत आज राजकीय चर्चांपेक्षा अन्न व औषध प्रशासनाच्या (FDA) अचानक केलेल्या तपासणीचीच अधिक चर्चा रंगली. भाजप प्रदेशाध्यक्ष रविंद्र चव्हाण यांच्या अध्यक्षतेखाली होत असलेल्या बैठकीच्या ठिकाणी FDAच्या पथकाने अचानक भेट देत नेत्यांसाठी तयार करण्यात आलेल्या जेवणाची तपासणी केली.
FDAच्या अधिकाऱ्यांनी बैठकीच्या ठिकाणी उपलब्ध असलेल्या अन्नपदार्थांचे नमुने तपासणीसाठी ताब्यात घेतले. राज्यात सध्या भेसळयुक्त आणि निकृष्ट अन्नपदार्थांविरोधात FDAकडून विविध ठिकाणी कारवाई सुरू असतानाच भाजपच्या महत्त्वाच्या बैठकीच्या ठिकाणी ही तपासणी झाल्याने राजकीय वर्तुळात चर्चेला उधाण आले आहे.
भाजपचे प्रवक्ते विनायक आंबेकर यांनी याबाबत माहिती देताना FDAचे अधिकारी बैठकीच्या ठिकाणी आले, त्यांनी अन्नपदार्थांची तपासणी केली आणि नमुने घेतल्याचे सांगितले. मात्र, प्राथमिक तपासणीमध्ये कोणताही आक्षेपार्ह प्रकार आढळून आला नसल्याचा दावा त्यांनी केला आहे.
प्रदेशाध्यक्षपदाची सूत्रे स्वीकारल्यानंतर रविंद्र चव्हाण यांच्या अध्यक्षतेखाली होणारी ही पहिलीच मोठी प्रदेश कार्यकारिणी बैठक आहे. त्यामुळे या बैठकीला भाजपच्या दृष्टीने विशेष महत्त्व आहे. मात्र, बैठकीतील राजकीय रणनीती आणि आगामी निवडणुकांवरील चर्चेसोबतच FDAच्या पथकाने केलेली अचानक अन्न तपासणी सध्या चर्चेचा प्रमुख विषय ठरली आहे.
अन्नपदार्थांचे घेतलेले नमुने पुढील तपासणीसाठी पाठवले जाणार असून, त्यातून नेमके काय निष्पन्न होते, याकडे आता लक्ष लागले आहे.
