मुंबई: नवी मुंबईतील तुर्भे परिसरात अन्नपदार्थांच्या उत्पादन आणि मुदतबाह्य दिनांकात फेरफार करून त्यांची पुनर्विक्री करणाऱ्या आस्थापनाविरोधात अन्न व औषध प्रशासन आणि नवी मुंबई गुन्हे शाखेने संयुक्त कारवाई केली. २४ ते २९ ऑगस्टदरम्यान करण्यात आलेल्या या कारवाईत तब्बल ४,९४२ कार्टन अन्नसाठा ताब्यात घेण्यात आला असून त्याची किंमत सुमारे ७५ लाख २१ हजार रुपये आहे. याशिवाय विना लेबल आणि मुदतबाह्य अन्नसाठाही जप्त करण्यात आला आहे.
मे. साधना एंटरप्रायजेस, टीटीसी इंडस्ट्रियल एरिया, तुर्भे येथे तपासणी केली असता विविध नामांकित निर्यातदार कंपन्यांशी संबंधित अन्नपदार्थांचा साठा आढळून आला. या मालाच्या मूळ पॅकेजिंगवरील उत्पादन दिनांक आणि Expiry/Use By Date पुसून त्यावर नवीन दिनांक छापला जात असल्याचे तपासणीत समोर आल्याचे प्रशासनाने म्हटले आहे. काही उत्पादनांवरील Ingredients आणि Nutritional Information वरही नवीन स्टिकर लावण्यात येत असल्याचा आरोप आहे.
कारवाईदरम्यान Lay’s, Kurkure, Bingo, Fun Flips, Maggi, Rasoi, Knorr, Hellmann’s, Thums Up आणि Limca यांसारख्या विविध खाद्यपदार्थांचा साठा आढळला. या प्रकरणात संबंधित भागीदार तसेच काही निर्यातदारांविरोधात तुर्भे पोलीस ठाण्यात FIR दाखल करण्यात आला आहे.
अन्न सुरक्षा व मानके कायदा २००६ आणि भारतीय न्याय संहिता २०२३ मधील विविध कलमांनुसार ही कारवाई करण्यात आली आहे. साधना एंटरप्रायजेसचा अन्न परवानाही तात्काळ प्रभावाने निलंबित करण्यात आला आहे.
अन्न सुरक्षा आयुक्त तुकाराम मुंढे यांच्या मार्गदर्शनाखाली ही कारवाई करण्यात आली. ग्राहकांच्या आरोग्याशी खेळ करणाऱ्या आणि मुदतबाह्य अथवा फेरफार केलेल्या अन्नपदार्थांची विक्री करणाऱ्यांवर कठोर कारवाई सुरूच राहणार असल्याचे प्रशासनाने स्पष्ट केले आहे.
