पुणे : शहरातील अवैध धंद्यांविरोधात सुरू असलेल्या मोहिमेअंतर्गत गुन्हे शाखा युनिट-2 च्या पथकाने गुलटेकडी परिसरातील अवैध जुगार अड्ड्यावर धडक कारवाई केली. या कारवाईत सहा जणांना ताब्यात घेतले असून, दोन मुख्य सूत्रधारांविरुद्धही गुन्हा दाखल करण्यात आला आहे. या कारवाईत रोख रकमेसह एकूण 6 हजार 450 रुपयांचा मुद्देमाल जप्त करण्यात आला आहे.
सलीम सय्यदसाब शेख वय -55, रा. लोहियानगर पुणे) साहिल अशोक शिंदे (वय-28, रा. जनता वसाहत पुणे) फरिद मस्जिद शेख वय -33, रा. कॅनलजवळ गुलटेकडी, पुणे) राहुल विजय जगधने वय 31, रा गुलटेकडी, पुणे) विक्रम रामभाऊ काते वय 43, रा गुलटेकडी पुणे), कृष्णा शिवाजी काळसुरे वय -36,रा. डायसप्लॉट गुलटेकडी) अशी गुन्हा दाखल करण्यात आलेल्यांची नावे आहेत.
पोलिसांनी दिलेल्या माहितीनुसार, सोमवारी (ता. 29) गुन्हे शाखा युनिट-2 मधील महिला पोलीस उपनिरीक्षक तेजश्री पवार, महिला पोलीस अंमलदार विद्या शिंदे, ऋषिकेश व्यवहारे, सद्दाम तांबोळी हे स्वारगेट पोलीस ठाण्याच्या हद्दीत गस्त घालत असताना त्यांना गुप्त माहिती मिळाली कि, औद्योगिक वसाहत, पितळे चौक, गुलटेकडी येथे अवैध मटका-जुगार सुरू आहे. माहिती मिळताच पथकाने घटनास्थळी अचानक छापा टाकला.
दरम्यान, या चौकशीदरम्यान आरोपींनी हा अवैध जुगार शाबीर शेख उर्फ शाहू (रा. कोंढवा) व बसवराज कन्ने (रा. गुलटेकडी) यांच्या सांगण्यावरून चालविला जात असल्याची माहिती दिली. त्यानुसार संबंधितांविरुद्धही कारवाई करण्यात आली आहे. या प्रकरणी सर्व आरोपींविरुद्ध स्वारगेट पोलीस ठाण्यात महाराष्ट्र जुगार प्रतिबंधक कायदा कलम १२ (अ) अन्वये गुन्हा दाखल करण्यात आला असून पुढील तपास स्वारगेट पोलीस करीत आहेत.
सदरची कामगिरी पोलीस उपआयुक्त गुन्हे गोहर हसन, सहायक पोलीस आयुक्त गुन्हे-1 शैलेश संखे या वरिष्ठांचे मार्गदर्शनाखाली प्रभारी पोलीस निरीक्षक राहुल खिलारे, पोलीस निरीक्षक अविनाश माने, महिला पोलीस उप पोलीस निरीक्षक तेजश्री पवार आणि त्यांचे पथकाने केलेली आहे.
