पुणे: गणेशोत्सव मिरवणुकांमध्ये आकर्षण ठरणाऱ्या ढोल-ताशा पथकांसाठी सरावाची अधिकृत जागा आणि वाद्यांची सुरक्षितता सुनिश्चित करण्याची मागणी काँग्रेस पक्षाने पुणे महापालिकेकडे केली आहे. या मागणीसंदर्भात काँग्रेसचे प्रदेश प्रवक्ते गोपाळ तिवारी यांनी महापालिका आयुक्त नवल किशोर राम यांना निवेदन सादर केले.

गणेशोत्सवाच्या पार्श्वभूमीवर विविध ढोल-ताशा पथके महिनाभर आधीपासून सराव सुरू करतात. मात्र, सरावासाठी निश्चित जागा नसल्याने त्यांना निवासी परिसरांमध्ये सराव करावा लागतो. त्यामुळे नागरिकांना त्रास सहन करावा लागतो. या पार्श्वभूमीवर महापालिकेने नदीपात्रातील जागांमध्ये अधिकृत गाळे तयार करून नियोजित वेळेनुसार पथकांना सरावासाठी जागा उपलब्ध करून द्यावी, अशी मागणी करण्यात आली आहे.
तिवारी यांनी दिलेल्या निवेदनानुसार, मागील वर्षी मुठा नदीला आलेल्या पुरामुळे अनेक पथकांची वाद्ये वाहून गेली होती. ढोल-ताशे ही वाद्ये महागडी असल्याने ती पुन्हा खरेदी करणे पथकांसाठी आर्थिकदृष्ट्या नुकसानदायक ठरते. त्यामुळे वाद्ये सुरक्षित ठेवण्यासाठी शाळांमध्ये खोल्या उपलब्ध करून द्याव्यात, अशी विनंतीही निवेदनात करण्यात आली आहे.

त्याचबरोबर, या अधिकृत जागांचा वापर करणाऱ्या पथकांकडून नाममात्र शुल्क आकारण्याची शिफारसही करण्यात आली आहे. ढोल-ताशा, झांज, लेझीम यांसारख्या पारंपरिक खेळांमुळे गणेश विसर्जन मिरवणुकांचे स्वरूप भव्य झाले असून, तरुणांनी यात मोठ्या प्रमाणावर सहभाग घेतल्याचेही तिवारी यांनी नमूद केले.
महापालिकेने या मागण्यांचा गांभीर्याने विचार करून गणेशोत्सवाच्या पारंपरिक आणि सांस्कृतिक समृद्धतेला चालना द्यावी, असे आवाहन काँग्रेसतर्फे करण्यात आले आहे.







