पुणे: पुण्यातील वाढत्या गुन्हेगारीच्या घटनांमध्ये आणखी एका धक्कादायक प्रकाराची भर पडली आहे. किरकोळ कारणावरून अल्पवयीन विद्यार्थ्याला भररस्त्यात अडवून मारहाण केल्याची घटना लोहगाव परिसरात घडली आहे. पावसाचे पाणी अंगावर उडाल्याच्या क्षुल्लक कारणावरून संतप्त झालेल्या दुचाकीस्वाराने १७ वर्षीय विद्यार्थ्याचा पाठलाग करत त्याला शिवीगाळ आणि मारहाण केल्याने परिसरात संताप व्यक्त होत आहे.
मिळालेल्या माहितीनुसार, लोहगाव येथील पोरवाल रोड परिसरात राहणारा १७ वर्षीय विद्यार्थी रविवारी रात्री सुमारे साडेनऊच्या सुमारास मित्राच्या घरातून स्कूटरवरून आपल्या घरी परतत होता. यावेळी डी. वाय. पाटील चौकाजवळील एका हॉटेलसमोर रस्त्यावर साचलेल्या पावसाच्या पाण्यातून त्याची स्कूटर गेल्याने समोरून येणाऱ्या एका दुचाकीस्वाराच्या अंगावर पाणी उडाले.
आपल्याकडून नकळत चूक झाल्याचे लक्षात येताच विद्यार्थ्याने तात्काळ संबंधित व्यक्तीची माफी मागितली आणि पुढे निघून गेला. मात्र, एवढ्यावरही दुचाकीस्वाराचा राग शांत झाला नाही. त्याने विद्यार्थ्याचा पाठलाग करून काही अंतरावर स्वतःची दुचाकी आडवी लावत त्याला अडवले.
यानंतर आरोपीने विद्यार्थ्याला शिवीगाळ करत कानशिलात मारली आणि तोंडावर बुक्क्यांनी मारहाण केली. घाबरलेल्या विद्यार्थ्याने “मी माझ्या वडिलांना बोलावतो,” असे सांगितले असता आरोपीने “बापाच्या जीवावर उडतोस का? चल पोलिसांत, तुला दाखवतो,” अशी धमकी दिली आणि घटनास्थळावरून पसार झाला.
घटनेनंतर विद्यार्थी घरी पोहोचताच त्याने संपूर्ण प्रकार आपल्या वडिलांना सांगितला. त्यानंतर वडिलांनी तातडीने लोहगाव पोलीस ठाण्यात तक्रार दाखल केली. पोलिसांनी अज्ञात दुचाकीस्वाराविरुद्ध गुन्हा नोंदवत तपास सुरू केला असून, आरोपीचा शोध घेण्यासाठी परिसरातील सीसीटीव्ही फुटेज तपासले जात आहेत.
