पुणे: दिवंगत उपमुख्यमंत्री अजित पवार यांच्या (Ajit Pawar Plane Crash) विमान दुर्घटनेनंतर ब्लॅक बॉक्स जळाल्याच्या बातम्यांनी संभ्रम निर्माण केला होता. मात्र आता संबंधित ब्लॅक बॉक्स सुरक्षित अवस्थेत असल्याची माहिती समोर आली आहे. सूत्रांच्या माहितीनुसार, अपघातानंतर सापडलेला फ्लाइट डेटा रेकॉर्डर बारामती तालुका पोलीस ठाण्यात सुरक्षित ठेवण्यात आला आहे. (Ajit Pawar Death)
28 जानेवारी रोजी बारामती विमानतळापासून काही मीटर अंतरावर हा अपघात झाला. कमी दृश्यमानता आणि तांत्रिक बिघाड ही प्राथमिक कारणे सांगितली जात असली, तरी तपास विविध स्तरांवर सुरू आहे. नागरी विमान वाहतूक महासंचालनालय अर्थात DGCA ने संबंधित कंपनीवर सुरक्षा नियमांचे उल्लंघन केल्याचा ठपका ठेवत त्यांच्या काही विमानांच्या उड्डाणांवर बंदी घातली आहे.
दरम्यान, AIBचे अधिकारी के. रामचंद्र यांनी 19 जानेवारी 2026 रोजी दुपारी 2 वाजता ब्लॅक बॉक्सची पाहणी करून तो सुरक्षित असल्याची नोंद केल्याची माहिती मिळत आहे. बॉक्सवर अधिकाऱ्यांच्या सह्या घेऊन स्टेशन डायरीमध्ये ऑनलाईन नोंदही करण्यात आल्याचे सांगितले जाते.
या प्रकरणात सखोल चौकशीची मागणी वाढत आहे. मुंबई उच्च न्यायालय येथे माहिती अधिकार कार्यकर्ते केतन तिरोडकर यांनी जनहित याचिका दाखल केली आहे. निवृत्त न्यायमूर्तींच्या अध्यक्षतेखाली न्यायिक आयोग स्थापन करून स्वतंत्र तपास व्हावा, अशी मागणी करण्यात आली आहे.
राजकीय पातळीवरही हालचाली सुरू असून मुख्यमंत्री देवेंद्र फडणवीस यांनी केंद्रीय गृहमंत्री अमित शाह यांना पत्र लिहिल्याची माहिती आहे. ब्लॅक बॉक्स सुरक्षित असल्याची नोंद तपासाच्या दिशेने महत्त्वाची ठरू शकते. आता अधिकृत अहवालातूनच अपघाताचे नेमके कारण स्पष्ट होणार आहे.
