पुणे : पुण्यातील खराडी परिसरात कारची काच फोडून ४२ हजार रुपयांची रोकड चोरी केल्याची घटना उघडकीस आली आहे. या प्रकरणी अज्ञात चोरट्यांविरुद्ध खराडी पोलीस ठाण्यात गुन्हा दाखल करण्यात आला असून, पोलिसांकडून सीसीटीव्ही फुटेजच्या आधारे तपास सुरू आहे.
पोलिसांनी दिलेल्या माहितीनुसार, खराडी परिसरातील एका सोसायटीत राहणाऱ्या ४६ वर्षीय महिलेने ९ जुलै रोजी रात्री आठच्या सुमारास आपली कार खराडी बाह्यवळण मार्गावर उभी केली होती. वैयक्तिक कामानिमित्त त्या काही वेळासाठी कारपासून दूर गेल्या होत्या.
याच संधीचा फायदा घेत अज्ञात चोरट्यांनी कारच्या खिडकीची काच फोडली. त्यानंतर कारमध्ये ठेवलेल्या पिशवीतील ४२ हजार रुपयांची रोकड चोरून ते पसार झाले.
महिला परत कारजवळ आल्यावर कारची काच फुटलेली आणि रोकड असलेली पिशवी गायब असल्याचे त्यांच्या निदर्शनास आले. त्यानंतर त्यांनी तातडीने खराडी पोलीस ठाण्यात तक्रार दाखल केली.
या प्रकरणी पोलिसांनी चोरीचा गुन्हा नोंदवून परिसरातील सीसीटीव्ही फुटेज तपासण्यास सुरुवात केली आहे. तसेच आरोपींचा शोध सुरू असून, पुढील तपास खराडी पोलीस करत आहेत.
दरम्यान, रात्रीच्या वेळी वाहनांच्या काचा फोडून चोरीच्या घटना वाढत असल्याने वाहनचालकांनी कारमध्ये रोकड किंवा मौल्यवान वस्तू न ठेवण्याचे आवाहन पोलिसांकडून करण्यात आले आहे.
