पुणे : पुण्यात अपघाताचे सत्र सुरूच आहे. शहरात पुन्हा मोठ्या अपघाताची घटना घडली आहे. जांभूळवाडी दरी पुलावर एकाच वेळी चार वाहने धडकली आहेत. हा अपघात शनिवारी पहाटे चार वाजण्याच्या सुमारास घडला आहे. मोठ्या कंटेनरनची लक्झरी बस, टेम्पो आणि कारला जोरदार धडक दिल्याने अपघात झाल्याची माहिती आहे.
या अपघातात दोन जणांचा जागीच मृत्यू झाला आहे, तर ४ जण गंभीर जखमी झाले आहेत. अपघाताची माहिती मिळताच घटनास्थळी पोलीस तसेच पुणे आणि पीएमआरडीए अग्निशमन दलाचे जवान दाखल झाले असून अडकलेल्या जखमींना बाहेर काढून रुग्णालयात उपचारासाठी दाखल केल्याची प्राथमिक माहिती आहे.
मिळालेल्या अधिक माहितीनुसार, पुणे-बंगळुरू मार्गावर कात्रज येथील जांभूळवाडी दरी पुलावर तीव्र वळण आहे. या ठिकाणी वळण असल्याने सतत अपघाताच्या घटना घडत असतात. त्यातच आज शनिवारी पहाटे चार वाजण्याच्या सुमारास साताऱ्याच्या बाजूने येणाऱ्या एका भरधाव कंटेनरने मुंबईच्या दिशेने येणाऱ्या ४ ते ५ वाहनांना पाठीमागून जोरदार धडक दिली. या धडकेत दोन जणांचा मृत्यू झाला असून अन्य गंभीर जखमी झाले आहेत. या भीषण धडकेत वाहनांचा चक्काचुर झाला आहे. ऐन दिवाळीत कंटेनर अपघातात दोघांचा जीव गेल्याने परिसरातून हळहळ व्यक्त होत आहे.
