पुणे: खेड-शिवापूरकडून पुण्याला येताना (Pune Accident) कात्रज घाटात झालेल्या भीषण (Pune News) अपघातात दोन तरुणांचा जागीच मृत्यू झाला, तर एक गंभीर जखमी झाली आहे. सकाळी साडेआठच्या सुमारास घडलेल्या या अपघातात पीएमपी बसने दुचाकीला धडक दिली. पोलिसांनी बसचालकावर गुन्हा दाखल करून त्याला ताब्यात घेतले आहे.
अपघात भिलारेवाडी येथील वळणाजवळ झाला. पोलिसांनी दिलेल्या माहितीनुसार, पीएमपीची सारोळा ते बालाजीनगर बस खेड-शिवापूरकडून कात्रजकडे येत होती. समोरून येणाऱ्या डंपरने अचानक ब्रेक लावल्याने दुचाकीस्वारानेही आपला वेग घटवला, पण मागून येणाऱ्या बसचालकाला आपला वेग नियंत्रित करता आला नाही आणि त्याने दुचाकीला जोरदार धडक दिली.
या धडकेत दुचाकीस्वार आकाश रामदास गोगावले (वय 29, रा. ससेवाडी, ता. भोर) आणि अनुष्का प्रकाश वाडकर (वय 27) यांचा जागीच मृत्यू झाला. नेहा कैलास गोगावले (वय 20, रा. ससेवाडी) ही तरुणी गंभीर जखमी झाली असून, तिच्यावर एका खासगी रुग्णालयात उपचार सुरू आहेत.
अपघातामुळे कात्रज घाटात काही काळ वाहतूक कोंडी झाली होती. आंबेगाव पोलिस ठाण्याचे वरिष्ठ निरीक्षक शरद झिने यांच्या पथकाने घटनास्थळी धाव घेऊन पाहणी केली. पोलिसांनी अपघातग्रस्त वाहने बाजूला करून वाहतूक पुन्हा सुरळीत केली. पीएमपी बसचालक सुधीर दिलीप कोंडे (वय 42, रा. आर्वी) याच्यावर गुन्हा दाखल केला असून त्याला ताब्यात घेऊन वैद्यकीय तपासणी केली आहे.
मृत आकाश गोगावले यांनी नुकतेच महाविद्यालयीन शिक्षण पूर्ण केले होते. दोन महिन्यांपूर्वीच ते पुण्यात बिबवेवाडी परिसरातील एका कंपनीत नोकरीला लागले होते. त्यामुळे तो दररोज दुचाकीने पुण्यात कामासाठी येत असे. अपघाताच्या दिवशी बस थांब्यावर गावातील दोन तरुणी कॉलेजला जाण्यासाठी उभ्या होत्या. त्यांना मदत करण्यासाठी आकाशने त्यांना दुचाकीवर ‘लिफ्ट’ दिली होती. दुर्दैवाने, ही मदत जीवावर बेतली आणि तिघे जण दुचाकीवर प्रवास करत असताना अपघाताचा बळी ठरले.
