Jayant Patil and Raj Thackeray attack Election Commission: राज्यातील मतदार यादीतील गंभीर त्रुटी आणि बोगस नोंदींवरून महाराष्ट्रातील प्रमुख विरोधी पक्षांनी राज्य निवडणूक आयोगाला आणि केंद्रीय निवडणूक आयोगाला चांगलंच धारेवर धरलं आहे. मुंबईत घेतलेल्या संयुक्त पत्रकार परिषदेत राष्ट्रवादी काँग्रेस (शरद पवार गट), काँग्रेस, मनसे आणि शिवसेना (उद्धव बाळासाहेब ठाकरे गट) या पक्षांच्या नेत्यांनी अनेक धक्कादायक आकडेवारी आणि पुरावे सादर करत निवडणूक प्रक्रियेवरील विश्वासार्हतेवर प्रश्नचिन्ह उपस्थित केले.
राष्ट्रवादीचे नेते जयंत पाटील यांनी गंभीर आरोप करत म्हटले, “आमचा अनुभव असा आहे की राज्य किंवा केंद्रीय निवडणूक आयोगाचा सर्व्हर महाराष्ट्रात दुसरंच कोणीतरी चालवत असल्यासारखा भास होतोय.” त्यांच्या या विधानाने खळबळ उडाली.
धक्कादायक आकडेवारी पुढे
विरोधकांनी सादर केलेल्या माहितीनुसार, मुरबाडमध्ये एकाच घरात तब्बल 400, पुणे कँटोन्मेंट भागात एकाच पत्त्यावर 869 मतदार तर नाशिकमध्ये 813 मतदारांची नोंद असल्याची समोर आल्याने आता निवडणूक आयोगाच्या कार्य पद्धतीवर प्रश्न उपस्थित होत आहे.
याशिवाय, मनसे अध्यक्ष राज ठाकरे यांनी दाखवलेल्या दस्ताऐवजनुसार, एका मतदाराच्या वडिलांचे वय 43 वर्षे असून मुलीचे वय 124 वर्षे इतके असल्याची नोंद आहे. या प्रकारामुळे मतदार यादीतील विसंगती असल्याचा आरोप त्यांनी केला.
निवडणुका पुढे ढकलण्याची मागणी
या पार्श्वभूमीवर विरोधकांनी एकमुखीपणे “बोगस व सदोष मतदार यादींची दुरुस्ती होईपर्यंत स्थानिक स्वराज्य संस्थांच्या निवडणुका घेऊ नयेत” अशी मागणी केली आहे.
काँग्रेस नेते बाळासाहेब थोरात यांनी स्पष्टपणे सांगितले की, “हे केवळ तांत्रिक चुकांचे प्रकरण नाही, तर निवडणूक प्रक्रियेवर परिणाम करणारी गंभीर गोष्ट आहे.”
विरोधकांनी निवडणूक आयोगाकडे तातडीने कारवाईची मागणी केली असून, यादी दुरुस्त करण्यासाठी स्वतंत्र व निष्पक्ष यंत्रणा नेमावी, अशी अपेक्षा व्यक्त केली आहे.
