पुणे : लोकसभा निवडणूक जाहीर झाल्यानंतर सर्वच पक्षांनी आपापल्या उमेदवारांच्या प्रचाराला सुरुवात केली आहे. त्यात आता काँग्रेसच्या स्टार प्रचारक आणि वरिष्ठ नेत्या प्रियांका गांधी या काँग्रेस उमेदवाराच्या प्रचारासाठी पुण्यात जाहीर सभा घेणार असल्याचे सांगितले जात आहे. प्रियांका गांधी यांची पुण्यात सभा होणार असल्याने कॉंग्रेस कार्यकर्त्यांमध्ये एकच जल्लोष पाहायला मिळत आहे.
लोकसभा निवडणुकीच्या पहिल्या टप्प्यातील मतदान पूर्ण झाले आहे. पण अनेक ठिकाणी अद्याप बाकी आहे. पुण्यामध्ये देखील लोकसभा निवडणुकीला आता रंगत आलेली आहे. भाजप पक्षश्रेष्ठींची पुण्यामध्ये सभा होत आहे. असे असताना आता कॉंग्रेस पक्षश्रेष्ठी देखील पुण्यामध्ये हजेरी लावणार आहेत. प्रियांका गांधी या लवकरच पुणे दौऱ्यावर येणार आहेत. पंतप्रधान नरेंद्र मोदी यांच्या दौऱ्यानंतर काहीच दिवसांत काँग्रेसकडून पुण्यात रॅली आणि सभेचे आयोजन करण्यात येणार आहे.
मे महिन्याच्या पहिल्या आठवड्यात पुणे जिल्ह्यातील चार लोकसभा मतदारसंघासाठी महाविकास आघाडीच्या समर्थनार्थ प्रियांका गांधी यांचा दौरा असणार आहे. काँग्रेसच्या स्टार प्रचारक प्रियांका गांधी यांच्यासह सचिन पायलट हे देखील त्यांच्यासोबत सभेला उपस्थित राहणार असल्याचे सांगण्यात येत आहे.
